Sorkar school 160 nung headmaster mali: ACAUT

Dimapur, November 24 (TYO):  SK Oil ochimashi amshiba nungi tenzüker wheat aser mid-day meal ochimashi amshiba tang SVC-i bushisüngdangdar, iba den külemi MNREGA senotsü nung ochimashi, lenmang majungba, pension ochimashi nungi sorkar mapa inyakertem itasen magütsüba, tim masüba lenmang ajanga mapa nung shimokba ama ochimashi jenti lir, aser tang school education department telung nung mepetmesü lir, koba ajanga sorkar school noklang aika timtem tensa ka nung lir, ta tanü ACAUT Nagaland, Media Cell-i sangdong ka ajanga metetdaktsü.

Media osangtem ajanga ashiba agi, sorkar school 160 nung headmaster mali. 2016 HSLC nung sorkar school nungi pass percentage 32.81% aser school 30 nungbo nil results asübaji tesüngmangtsü mali. Iba ya ajanga state level Teacher’s Day anogomong nung School Education Minister-i pai iba khuret agir ta jembitsüsa aküm südi, ta kasa sangdong nungsa shia lir.

Iba dak sentakba nung ACAUT Media Cell-i, “Commissioner &Secretary, F. P. Solo-i nangzüka aliba ama, School Education dang December 2016 tashi nung Graduate Teachers, 1983-89 batch temji Asst. Head Masters (AHMs) aser Junior Education Officers (JEOs) jenjangi ajungkettsü mepishir. Department-i telemtetba shitak agiogo, kechiyong junior batch (1992)-i 1983-89 batch jenjang agitsü makok, aser iba telemtetba ajanga school ajak nung nüngdakba headmasters lia school junga aotsü imlar,” ta metetdaktsü.

“Tanabuba nung, 2013 November 25 nü Office memorandum agüja liaka Finance department-i mapa nungi anisüngzükba sülen constables ama teküpbok jenjang nung inyakertem nem TA magütsüi bendangshidanga inyakyimbaji ACAUT-i aitsür. Police nung teküpbok jenjang nung inyakertemji police force nung tongtiret lir aser parnok ama noklang mesüra merirjang nem TAs magütsür, ajisüka temaba ketdangsertemibo parnok mapa nungi anisüngzükba sülen item tebilemtsü majurur. Jenjang apir item tebilemtsü ya lira tarutsü nung tensa majungtsü. Anungji tasüngdangba tulutibaji, item sen ajakji kongi ao (?) ” ta ACAUT Nagaland Media Cell-isa metetdaktsü.