Sorkar school tem nung HSLC result tajungba akümtsü: Yitachu

Kohima, March 24 (TYO): March 24, 2017 nü Kohima nung 12buba Nagaland Legislative Assembly 15buba session nung MLA, Mmhonlumo Kikon-i, 2014 küm nungi 2016 kümtem tashi nung Nagaland nung HSLC tatidang nung sorkar school kwi-i nil result angu, ta asüngdangba langzüdang School Education Minister, Yitachu-i, 2014 küm school 24, 2015 küm 38 aser 2016 küm school 30 liasü, ta metetdaktsü.
Sorkar school tem nungi High School Leaving Certificate results tajungba akumtsü atema School Education Department-i kechi merasa agi? ta asüngdangba langzüdang Minister-i, school aser tesayurtem inyakyim melenshiba, nüngdakba school temi head masters aser assistant headmasters posting yokba, maths aser science tesayurtem shimba aser coaching class tem agiba indang metetdaktsü.
Minister-isa, school tem tashi itshitsü atema ketdangsüa mita toudak lir aser RMSA o SSA kübok English, maths aser science nung tesayuba agutsür, ta shisem.
Yitachu-i ashiba agi, school aika nung, talisa RMSA upgraded school tem nung science aser maths tesayurtem agi anüngba agi HSLC tatidang nung nil result angubaji tongti kuli liasü.
Paisa, tarutsü nung tatidang results tajungba akumtsü atema department-i mezüng ama asütsü aser science aser math tesayur post kar arts tesayur agi meyipba melenshitsü merangdar, ta ashi.
Minister-isa, item ama post ji akhi ama melentsü aser tesayurtem jangjateta science aser maths tesayur nüngdakba school temi yoktsü, ta metetdaktsü.
Tesayur temelen (proxy) yokba aser tesayur maliba dak sentakba nung Kuzholuzo Nienu-i asüngdangba langzüdang Minister-i, yimtsüng aika nung parnok indang tongti nükjidongji school lapoktsü lir, aser kar nungbo kaketshirtem mali saka sen angutsü atema tesayurtem telidak lir, ta ashi.
Minister-isa, sorkar school tem nung proxy tesayur tali akumba nokdangtsü atema item osang Dept. nem metetdaktsüdang item ama school tem shibangtsüogo, ta shisem.