Sorkar school tesayurtem atema School Counseling course tenzüker

Kohima, Rongchii (April) 16 (TYO): State Council of Educational Research Training (SCERT), Nagaland-i sorkar tesayurtem atema School Counselling indang ita trok certificate course ka tenzükogo.
Iba course ji SCERT Nagaland retired director Vipralhou Kesiezie-i tanü tenzüktsü.
Nagaland nung sorkar school shia nungi tebur aser tetsür tesayur ka ka bosa school guidance & counseling training agitsüla ta ser iba course tenzüker, ta SCERT Director, T Sekhose-i ashi.
Iba course nung sorkar school nungi tesayur nem ita trok atema diploma on school counseling training agütsütsü aser parnokji school counselor ama asütsü, ta paisa ashi.
SCERT Nagaland-i NCERT, New Delhi nungi technical & academic teyari agia iba course agitsü aser All Nagaland Counsellors Association, Government of Nagaland, Department of Health & Family Welfare, Department of Social Welfare, aser Department of Psychology under Nagaland University nunger den yaritepa training ji agütsütsü, ta T Sekhose-isa metetdaktsü.
Course nung agitsü tongtipang onüktemji- psychology, counseling theory and practice, spiritual counseling, mental health, testing aser assessment lir.
Tanur ka atema tesayur kaji kanga dang tongtipang nisung ka lir aser aikati pei tsürabur dang nungi tesayurtem ang akhümtsübur. Tanurtem tekolok nung tasüngdangbatem agi sünga lir aser parnoki angazüknür aser ajak angatetnür. Tesayurtemi ajak meteta lir ta parnoki bilemer aser iba jagi tesayurtemi kaketshirtem khuret angateta sayutsü nüngdak, ta Kesiezie-i o jembidang ashi.
School nung kaketshirtemi kibong balala nungi lir aser parnok ajak khuret aser tebilemba balala lir. Asenoki parnok aria bilema parnok indang khurettem angadanga telangzüba agütsütsüla, aji ta mesüra parnok taküm nung iba jagi tetsükdaktsü bentsür arutsü, ta paisa ashi.
Linük nung school counseling indang certificate course agibaji SCERT Nagaland mezüng lir aser iba ajanga tesayurtemi tanurtem tajungba nung anitettsü imlar, ta taoba taoba SCERT director-isa shisem.
Iba sentong nung mendenji SCERT joint director Moatemjen liasü, Baptist Mission Church Kohima Senior Pastor Rev Moa Longchari-i temoatsü meshia sarasadem, UDA DIET Chiechama Mesenti ajanga ken ka aten aser SCERT Associate Prof. Dr Zavise Rume-i anküp tepela o jembi.