Sorkar school tesayurtemi yimten tashi mamshitsüla

Kohima, February 1 (TYO): Sorkar tesayur ajaki yimtenren tashi amshia Dimapur nung mapa inyaknür, ta tanü School Education and SCERT Nagaland Advisor, K T Sukhalu-i ashi.
Hokolbarnü SIEMAT Hall, Kohima nung District Education Officers, Sub-divisional Education Officers, Junior Education Officers, Inspector of School aser Directorate of School Education ketdangsertem den anogo ka senden amendang K T Sukhalu-i ashiba agi, tanur shia nem Right to Education ngudaktsütsü atema sorkari state ajungalen school tem lapoka lir.
Sorkar school tem jenjang tajungba kümdaktsütsü atema department-i tesayurtem timi lemsatsüshi mapa inyaker saka Naga nunger tesayur shiai Dimapur nung mapa lemzükdaktsünür aser iba atema yimtenren tashi amshir, ta paisa metetdaktsü.
Department-i tesayurtem rationalization mapa tembangba sülen tesayurtemi pei inyakba tesem nung mapa lemzüktsütsü atema yimtenren tashi mamshitsüla. Nagaland nung nisung ajaki sorkar mapa aginür saka mapa anguba sülen meinyaker, ta Advisor-isa shisem.
Nija school tem den medemdangra, sorkar school tem nung tesayur tajungtiba lir saka results reprangdangra sorkar school tem tamajungba. Asenok ket nung hadir (tesayurtem) tajungtiba lir aser asenoki asenok tanur nem education tajung agütsünür. Nagaland tejakleni odaktsünüra, asenoki school nung tesayuba shitak aser tajung sayutsüla, ta paisa ashi.
K.T Sukhalu-isa Education department ketdangsertem aser talisa DEOs aser SDEOs dang pei pei tesem nung school tem semdangtsü aser osang metetpelatsü ayongzük.
Department ketdangsertemi school textbooks mapang shitak nung bener aruba atema tenüngsang agütsür. Maneni, uniforms-a mapang shitak nung tonga alemtsü imlar. Textbooks ji shishilembadak masü saka kaketshirtem ket atongtsüla, ta paisa shisem.
Sentong nung School Education Department Principal Secretary, Menukhol John-ia department tajungba kümdaktsütsü atema ketdangsertemi yariteptsü ayongzük.
“Unified District Information System for Education (UDISE) data mapang shitak nung tembanga inyaktsü atema yaritepdaktsünür. HSLC aser HSSLC examination 2019 indang results sangdongba sülen Department-i DEOs aser SDEOs den senden balaka ayonga amentsü aser idangji nenoki pei pei tesem nung education sector tajungba kümdaktsütsü atema power point presentations ajanga tebilembatem lemsateptsü,” ta Menukhol John-isa ashi.
National Council of Educational Research and Training books amshitsü atema telemtetba ka agiogo aser 2020 nungi Nagaland nung board exams agibayim melenshitsü, ta paisa shisem.
Textbooks tonga aruogo saka 2020 nungi academic metenzükdang alemtsü atema December ita tashi nung kakettem menüngtsü merangtsü, ta Principal Secretary-isa metetdaktsü.