Sorkar tasen akümtsü atema temzüngi melar: TR Zeliang

Kohima, July 17 (TYO): Independent MLA 7-i pusema NPF MLA 37-i sorkar tasen ka kümtettsü temzüngi melar aser temeten lir, ta Hombarnü taoba Chief Minister T R Zeliang-i ashi.
“NPF Legislature party-i lennir melennür, anungji telok tulubai sorkar akümtsü atar” ta tanü Assembly Secretariat nung Tir election atema vote agütsüba sülen TR Zeliang-i osangbenertem dang ashi.
Tang MLA temi Chief Minister teinyakdak Dr Shurhozelie Liezietsu anema nokdakba ya TR Zeliang lenisüba kübok lir aser parnoki July 8, 2017 nü Angh dang sorkar tasen ka akümtsü atema kuli agüja liasü.
“Onok telok tuluba lir anungji democratic inyakyim ajanga onok nem sorkar kümdaktsütsüla” ta tanü TR Zeliang-isa metetdaktsü.
NPF Party sasep nung putepshitsü indang temepishiba atema olen ka ashidang “party onükji legislature onük den balala lir, anungji onoki sorkar akümba sülen ang putepshiba indang onük jembitsü” ta TR Zeliang-i metetdaktsü.
“Tang ya onoki sorkar akümtsü indang dang jembir kechiyong legislature party aser political party naji balala. State Angh-i Arrla 174 amshitsüla kechiyong iba nung ‘Sessions of the State Legislature, prorogation and dissolution by the Governor’ indang shia lir” ta paisa shisem.
TR Zeliang pusemba MLA temi tang Chief Minister teinyakdak Dr Shurhozelie-i by-elections nung tokteptsü atema mulunga agizükba sülen iba telemtetbaji meyipa agi ta Dr Shurhozelie pusemba council of ministers-i ashiba onük atema TR Zeliang-i “by-election nung tokteptsübaji onoki mulungba masü saka pai (Dr Shurhozelie) jangraba liasü. Pa NPF tir asünung shingaia pa menokdangtet” ta metetdaktsü.
“Iba ya by-election indang onük masü kechiyong ibajibo constituency ka atema dang lir, saka tang adokba onük ya lenisüba melentsüba atema lir. Anungji, by-election ajanga lenisüba melenba nung tetsükdaktsü kecha majurutsü” ta TR Zeliang-isa ashi.