Sorkar tashi arishia opposition longjemogo: PM Modi

Lucknow/New Delhi, Aami/June 28 (Agencies): Tanü Ato kilonser, Narendra Modi-i opposition party tem aija, parnoki sorkar tashi arishiba ajanga longjemogo, ta ashi.
Tanü 15buba aso nung sangro aser temeshi nisung, Kabir Das Sant asüba district, Kabir Nagar district nung lokti senden ka nung jembidang Modi-i, Kabir-i yimsüsürtem nem kin kidong telemsa kecha makai nüburtem atema inyakdaktsünüa liasü, ajisüaka tanübo yimtenren lenirtemi sorkar tashi atema dang longjemer, ta ashi.
“Kati ka aitsüteper aser Emergency atema jembirtemi (opposition) tashi arishia tang longjemer,” ta pai ashi.
Paisa, “Item (opposition) lenirtem aser yimtenren party temi nüburtem atema bilema mali ajisüaka parnok aser parnok kibongtem jenjang ajungkettsü atema dang bilemer,” ta ashi.
Anogo ishika tejaklen taoba mapang Ato kilonser, Indira Gandhi-i Emergency benokba sülen küm 47 ajungba anogomong nung opposition party tem tsüngda Emergency atema aitsütepa liasü, ajisüaka tangbo parnok longjemer, ta pai ashi.
Triple talaq bill dak sendakba nung Modi-i, Muslim tsürtem nem kasa jenjang agutsütsü atema par sorkari iba bill benok, ajisüaka yimtenren party kari iba bill anema nokdaker, ta ashi.
“Item party tem jagi Muslim tsürtem atema mebilemtsür,” ta pai ashi.
Kabir tesayubatem bilemteta, Modi-i, pai nisung telemsa ajak ajungtsü aser kasa züngshitsü atema jembia liasü, aser par sorkaria kasa tangatetba nung inyaker, ta ashi.
“Ozü sorkari sensakertem, Dalits aser tepetzük tia nung alirtem atema maneni inyaker. Nisung crore 5 atema bank account lapoktsüogo, metsümeshidak crore 1.25 yangluogo aser insurance ajanga nisung crore 1 ayimjemogo,” ta paisa ashi.
Tanep Modi-i Kabir Das leper nung naro tokja asür nem akhüm agüja liasü.
Tanü Modi den Uttar Pradesh Chief Minister, Yogi Adityanath aser putirtem dena liasü. Tanep Gorakhpur airport nung tzü atsünga aliba agi Ato kilonser amenba tayimtsüji Lucknow nungang anenzük, aser iba mapang nung Uttar Pradesh Angh, Ram Naik den ketdangsertemi pa agizüka liasü.