Sorkar telemtetba ajanga sen cr. 15,000 takoksa nguogo: Derek O’Brien

New Delhi, Nov. 24 (Agencies): Tanü Rajya Sabha nung TMC MP, Derek O’Brien-i, sorkari sen tamshidak anentsüba ajanga anogo 15 tsüngda linük GDP nung sen crore 15,000 takoksa nguogo, ta ashi.
Anogo aika Parliament senden mekateti aruba sülen Ato kilonser, Narendra Modi-i senden nung adentsü lemtetba agi tanü senden junga katetogo.
Ato kilonser, Modi senden nung adenba maongka agia opposition party temi ken o ka nungi ka ta benoka sorkar telemtetba anema jembi.
TMC MP, Derek O’Brien-i Modi telemtetba ajanga takoksa aser timtem angubatem metetdaktsüba den külemi, iba mapatong junga mebenokba ajanga GDP jenjang raksaba indang tatongi metetdaktsü.
“India nung aliba yimtsüng 5 shia nungi yimtsüng 4 nungbo bank mali. Debit card shilem 90 bo sen agizüktsü atema dang amshir. Banking sector den sentaktepa aliba nütsüngtemi ‘cashless modes’ mamshir. Anungji cashless society ka masüdang nai pongmang lima ka nung alitsü makok. Finance Minister-i, iba mapatong benokba ya junga benokogo ta shiogo, saka temelenshi aiben benoker,” ta ashi.
West Bengal Chief Minister aser Trinamool tongti, Mamata Banerjee-i jembiba o lepshia O’Brien-i, “Ni black money anema sashia nokdakba den külemi aayangertem, tilateri shishilembartem aser sensakertem atema-a bilemtsür. Asüng nungi parnoki nüngdakba oset/chiyungtsü koma alitsü?” ta asüngdang.
“Ato kilonseri bendanglen nungi black money bener marutet, ibayongji aika sayangdaner. Ni iba ya Ato kilonser dang asüngdangner: Mapa kanga meranga inyakba ozü nüburtem shirnoki hopta shia taa sen 500 notes amshia dal, aata aser jang alitsü? Iba ya taochi maket aser middle class nüburtem, aluyimertem, süngolu nung inyakertem, aayanger sector, dokan lapokertem aser tilateri shishilembartem, parnok ajak timtemtsü,” ta paisa ashi.
“Nai (Modi) nüburtem ola nembanga meyutettsü. Onoki iba onük anema longkak aittsü. Nai Mamata Banerjee den onok tepoukdaki yoktsü akok,” ta O’Brien-i ashi.
“Ni yangi Ato kilonser matsüngdang züngdangba ana benokner. Anogoshia GDP ji sen crore 45,000 lir. Iba nungjagi shilem 59 bo nijatemi alir, aser ibaji sen crore 27,000 adoker. Iba nungjagi shilem 87 bo sen ‘cash’ agütsür; ibaji asadangra sen crore 24,000 lir. Anungji tesüiba anogo 15 nung asenoki GDP nung sen crore 15,000 takoksa nguogo,” ta O’Brien-isa shisem.