Sorkari Aadhaar Act indang sangdonger

New Delhi, March 28 (Agencies): Centre sorkari, Aadhaar Act tasenba ajanga subsidy transfer sütettsü aser tajangzük angutsü temsüa alirtem tajangzük angutsü, ta metetdaktsü.
Aadhaar (Targeted Delivery of Financial & other Subsidies, benefits & services) Act, 2016 ajanga “inyakyim takang amshia ochishia subsidy, tajangzüktem aser service tem agütsütsü, Consolidated Fund of India nungi sen intoktsü aser ibaji unique identity numbers ajanga nisungtem nem agütsütsü,” ta March 26 nü sorkari sangdongogo.
Aadhaar card ji tajangzük balala ajak atema amshitsü aser ibaji consolidated fund of India den sentakteptsü.
Iba Act atema Aadhaar Bill ji March 16, 2016 nü Parliament-i agizükogo. Iba Act ya Parliament nung money bill ama benoka liasü.
Ajisüaka iba Act ajanga, Aadhaar number agüja malirtem nem subsidy, tajangzüktem aser service tem atema tanga lenmang agütsütsü.
Aadhaar number ji senso ka, ta kuli asüba mesüra talidak kuli atema mamshitsü.
Iba Act nung ashiba agi, “Tetsürtem, tanurtem, teintet rogotem, tangar memenepertem, mapa shia memetetertem, nomadic tribes mesüra teti atema pei talidak makartem aser temzüng nung aliba category balala nung alir, nem Aadhaar card agütsütsü atema tashi aliba agüja aliba tenteti (UIDAI) mera balaka agitsü.”
Iba Act nung, Centre aser state sorkar napronglai tejangzüktem aser subsidy atema Aadhaar lemtsütsü atema ozüngtem lir.
Iba Bill nung, temzüng alema inyakba atema senchi sen 10,000 nungi sen lakh 1 tashi aser tepuokdak ayutsü atema-a ozüngtem lir.
Tan ita Parliament nung Union Finance Minister, Arun Jaitley-i, Aadhaar card ajanga LPG atsükertem nem subsidy agütsüba ajanga Centre nung sen crore 15,000 dak tema kümzükogo, ta metetdakja liasü.