Sorkari ano Parliament senden ayongzüktsü akok

New Delhi, August 25 (Agencies): Tanü Parliamentary affairs minister, Venkaiah Naidu-i, yimtenren party balala den jembiba sülen tongtibang bill tem agizüktsü asoshi sorkari ano Parliament senden ka ayongzüktsüa akok, ta ashi.

Goods & Services Tax Bill agizüktettsü atema sorkari mera agiba mapang ka nung Mongolbar nü sorkari Congress den ajurua jembiogo, saka opposition party-i iba bill nung alibatem tejangja züngdangmatsü, ta shiogo.

Venkaiah Naidu-i iba onük nung Lok Sabha nung Congress lenir Mallikarjun Kharge ajuruba sülen Kharge-i, “Parnoki (sorkari) senden temeja ka ayongzükner aser parnoki party ajak den tongtepa jembidar ama reprangteter. Onoki bill nung yanglushiba ozüngtemji mereprangdang tashi mesüra standing committee aser sorkar tsüngda benokba nung melungtepbaji memetet tashi iba nungji onoki kecha meshitettsü,” ta ashi.

Congress lenir tain Kharge-isa, bill nung ozüng kobasa agizük mesüra intok’ar ibaji reprangdangtsü nüngdak, ta ashi.

“GST bill ji House anaprong nung balala agizüktsüla. Ibaji joint session ka nung mesütettsü. Parnoki senden mayongtsü ama ni bilemer. Iba asoshiji-a anogo 14 notice nüngdaker,” ta Congress lenirisa ashi.