Sorkari anogo atsülangaka tenüng agütsürtem maliasü

Kohima, January 9 (TYO) : Nagaland nung urban local bodies (ULBs) elections atema tenüng agütsüdakjang ta Nagaland sorkari Naga tribal teloktem mesüzüktsü merangaka, Hombarnü Naga nunger lanur meyirjang aikati tesem balala nung mokdangba sentong takok ngudakja shilem tajung agiogo.
Tetsür nem 33% lemzükja ULBs indang elections magidaktsütsü ta kin telok balalai nokdakaka, candidate 558-i tenüng agütsüogo aser parnok rongnung NPF 268, Congress 31, BJP 79 aser Independents 180 lir. Tenüng agüja alirtem rongnung tetsür 171 dena lir.
January 7, 2017 tashi nung Municipal Council ka aser Town Councils 25 nung tenüngtemji agüja liasü. ULBs trok nung tetoktepnür tenüng ka danga magütsüba agi, state sorkari tanü nikongdang 3:00 ako tashi tenüng agütsütsü asoshi mapang apulokja liasü.
Sorkari mapang agütsüsemaka, kin telok balalai pei pei lushi nung candidate temi Returning Officer’s office nung oa tenüng magütsüdaktsütsü atema mokdangba sentong balala ayongzüka agi.
ULB indang alections atema tenüng ka danga magütsüba council trokji- Kohima aser Mokokchung Municipal Council tem, Medziphema, Changtongya, Tuensang aser Mon Town Council tem lir.
Kohima nung Angami Youth Organisation (AYO)-i Angami Public Organisation (APO) lenisüba kübok mokdangba sentong agi aser Angami yimtsüng shia nungi nübotem adenshia nisung meyirjang 25 shi kati shilem agiogo.
Tanü mokdangba sentong agidang TCP gate nung nübo lemzükertemi Assam Rifles indang tayimtsü tila ka (drone) lijak agi kahzük. Iba drone ji AR-i mokdangba maparen indang osang miima bendentsü atema amshiba liasü aser drone ji Kohima DC ket nung agütsüogo, ta AYO-i ashi.
Mokokchung district nung Ao Senden-i Mokokchung Municipality aser Changtongya Town Council telongtet nung mokdang aser Tuensang district nunga Chang Khulei Setshang (CKS) o Tuensang Village Citizen Union nati mokdangba sentong ayongzüka agi.
Mokokchung, Changtongya aser Medziphema council tem nung Returning Officer-i tenüng agütsüdaktsü atema tesem melenshi saka iba mapaji takok mongutet, ta osang kar ajanga ashi.
Ano külen, Mon district nungbo Chi & Mon Town Land Owners Association-i State Government aser Land Owners tsüngda 1964 Agreement mapa küma inyakang ta takhangba agüja elections anema nokdak.
Nagaland nung ULBs indang elections atema tenüng agütsüba maparen tembanga aruba sülen asüng candidate tem indang temetettsütem reprangtsü aser tenüng meyipa agitsü atema tatembangba anogoji January 17 lir.