Sorkari ashiba nung ajemdaker RBI-i telemtetba agi

New Delhi, January 10 (Agencies) : November 7, 2017 nü sen 500 aser 1,000 tejentem anentsübaji sorkari tuyuba nung ajemdaker inyak ta Reserve Bank of India-i metetdaktsüogo.
Congress lennir M Veerappa Moily-i aniba Parliament nungi Department-Related Committee of Finance-i osang agütsüba nung, “sorkari November 7, 2016 nü RBI dang taila sen amshiba, kiralongrartem senotsü agi yariba aser ozüng alema sen amshiba khurettem nokdangtsü atema jenjang aika aketba sen 500 aser 1,000 anentsü atema RBI indang Central Board-i agizükang ta metetdaktsü.”
Iba tetuyuba anguba sülen RBI indang Central Board, tasüngji senden jatepa amen aser idangji parnoki sorkari ashiba onük benoka olemtep aser sen 500 o 1000 tamshidak anentsü atema telemtetba agi, ta Department-Related Committee of Finance-isa ashi.
RBI-i telemtetba agiba sülen ghonda ishika tsüngda Prime Minister Narendra Modi-i anir Union Cabinet senden ka amen aser idangji parnoki sen 500 aser 1000 tejentem nokdangtsü telemtetba agi, ta Committee-is agütsüba osang nungsa shia lir.