Sorkari bill tem Select Committee dangi meyoker: Opposition

New Delhi, Chiteni/July 31 (Agencies): Bodhbarnü Rajya Sabha nung opposition-i sorkar dang, nenoki nangzükba ama triple talaq bill densema bill kar Select Committee nem magütsü, ta aitsü.
Zero Hour mapang nung iba onük süoka Opposition lenir, Ghulam Nabi Azad-i, sorkari opposition dang nenoki koba bill sa Select Committees dangi yokner ta asüngdangogo, yamaji party ajak nungi lenirtemi tajemba agi bill trok reprangshitsü atema committees nem agütsünüa liasü, ta ashi.
“Ni Chairman nem ya metetdaktsüner. Ni nü nem tiyongi aita inyakdaktsüner. Onoki RTI bill Select Committee ka nem agütsünüa liasü,” ta pai ashi.
“Na kibur lir, nai ner nisungtem dang arutsü atema metetdaktsütsüla, aser iba bill ya Select Committee nem agütsütsü ta onoki amanger. Ibaji meinyak. Iba ya sorkari tim mesüi inyakogo,” ta Azad-i ashi. Mongolbarnü triple talaq bill agizükba dak sendakba nung pai iba o ya jembi.
Pai ashiba agi, Parliamentry Minister ajanga sorkari opposition ajuruogo, aser bill kobasa Select Committees nem agütsüdaktsüner, ta Minister-i asüngdangogo.
“Onoki parnok nem bill 23 agütsü, aser iba nungjagi tesadang kabosa Select Committees nem agütsüdaktsünüa liasü. A-category nung aliba bill 6 aser B-Category nung bill ana onoki Select Committees nem agütsüdaktsünüa liasü,” ta Azad-i ashi.
Azad-i jembiba oji TMC nungi Derek O’Brien aser SP nungi Ram Gopal Yadav (SP) natia pusema jembi. Iba sülen Chairman M Venkaiah Naidu, “Ni angashiogo. Ni ibaji reprangshitsü. Nenoki iba onük süokogo, anungji ni ibaji shisadangtsü,” ta ashi.