Sorkari black money rizüngertem nem shilem 50 meyipa agütsür: Rahul Gandhi

New Delhi, November 30 (Agencies): Bodhbarnü Congress tatong Tir, Rahul Gandhi-i, sorkari income tax ozüng yanglushiba ajanga black money rizüngertem yarir, kechiyong kuli maliba sen tesadang kabo parnok nem meyipa agütsütsü, ta ashi.
Parliament kima osangbenertem den jembidang sorkar aija Rahul-i, sorkari black money rizüngertem nem ano sen shilem 50 meyipa agütsür, ta ashi.
Yashi Lok Sabha nung Taxation Laws (2nd Amendment) Bill agizüka liasü, koba ajanga black money rizüngertemi saru agütsütsü atema mapang lateta agutsür.
Iba Bill ozüng ajanga- bank tem dang black money sangdongertemi surcharge aser senchi densema saru shilem 50 agütsütsü.
Lok Sabha nung opposition MP temi kimai ayazüka aluba dak sentakba tasüngdangba ka langzüdang Rahul Gandhi-i, “Kodang nisung kar südir onoki asürtem nemji akhümtsü agütsür, iba yimyaji Parliament nung benshia arur. Tang mezüng sepai asürtem (Nagrota amakba) nem akhüm magütsü, ibayongji opposition-i kima ayazüka alu,” ta metetdaktsü.
Kiralongrartemi Jammu nung aliba army camp ka amakdang asür sepaitem nem akhüm agütsütsü atema opposition züngsemtemi takhangba agütsü, saka Lok Sabha Speaker-i ibaji magizükbayong opposition MP temi longkak aita kima ayazüka alu.
Congress lenir Rahul-i aitsüba langzüa Information & Broadcasting Union Minister, M Venkaiah Naidu-i, “Linük defence dak sentakba nung Congress-i politics asayaba ya kanga tia maka,” ta ashi.
Paisa, “Nagrota nung telungpurtem mita odar ta Speaker-i metetdaktsü. Kodang mita aobaji tembangdir House nung sepaitem nem akhüm agütsütsü,” ta ashi.
Congress Party aija Naidu-isa, “Linük nüburtemi item ama tilateri politics asayaba sempar. Question Hour mapang nung Congress züngsemtemi kimai ayazüka ao, aser meyipa aru. Congress-i o lemtep mekanüba den külemi senden mekadaktsüner, kechiyong parnok jungkai adoktsü ta parnoki tsübur. Iba ya Nagrota nung asürtem mezüngmeshiba lir,” ta ashi.