Sorkari chana aser dal nung sen tutsüogo

New Delhi, November 06 (Agencies): Cabinet Committee on Economic Affairs (CCEA)-i 2015-16 atema masoor dal aser chana (gram) quintal shia sen 250 tutsüogo. Tan sen tutsüba sülen masoor dal quintal nung sen 3,325 aser chana quintal nung sen 3,425 kümogo.
Pulses nung minimum support price (MSP) tutsüba dang masü saka CCEA-i masoor dal aser chana naprong nung quintal shia sen 75 agütsüsemtsü (bonus) nangzükogo.
Wheat MSP 2015-16 atema quintal nung sen 75 tutsüba ajanga sen 1,525 kümogo. Iba den külemi oilseeds nunga sen 250 tutsüogo.
“CCEA-i 2015-16 kümtem nung adokba ‘rabi crops’ tem nung 2016-17 nungi MSP atutsü temelaba agütsüogo,” ta Power Minister Piyush Goyal-i parnok senden amenba sülen ashi.
Commission for Agriculture Costs and Prices (CACP)-i temelaba agütsüba ama rabi crops trok– wheat, barley, gram, masoor, rapeseed-mustard seed aser safflower seed nung MSP tutsüogo, ta pai ashi.
Goyal-i, Chana aser masoor dal noklang nung shilem 8 tutsüogo, ta ashi.
“CACP-i temelaba agütsüba ama tanü Union Cabinet-i chana aser masoor dal quintal shia sen 75 agütsüsemtsü lemtetogo. Iba sen tutsüba aser bonus agütsüba ajanga aluyimertem temulung terabo süngzüktsü,” ta Paisa ashi.
Ano barley quintal nunga sen 75 tutsüba ajanga sen 1,150 aliba sen 1,225 kümogo.
Rabi crops mongpu ya October ita nungi tenzüker aser April ita nungi arutsü. MSP ya sorkari aluyimertem dang chiyungtsü alizükba jenjang dang ajar anungji chiyungtsütem nung MSP dang nungi sen tajemba akümdang sorkar bang aiter.
Tan sen tutsüba ajanga aluyimertemi alu kanga jangra ayimtsü aser ibaji ajanga tanga linük nungi chiyungtsü aliba ajema akümtsü. Alu nungi item chiyungtsü peria manguba ajanga sen tali agi yokteper, tesem kar nungbo pulses seret nung sen 190 tashi agi ayoker aser ibaji ajanga sorkari lenmang aisü nungi sen ajemtsü nokdanger.
Oilseeds tsünertem ajungmesotsü asoshi CCEA-i rapeseed-mustard seed quintal nung MSP sen 250 tutsüba sülen quintal nung sen 3,100 aliba 2015-16 atema quintal nung sen 3,350 kümogo.