Sorkari college kimungtem alizüka arrtsü atsüdangtsüla: ANCSU

Dimapur, February 2 (TYO): All Nagaland College Students’ Union (ANCSU)-i Education Tour 2019 mezüngbuba shilem agiogo.
January 30 nungi February 1, 2019 tashi parnoki Mokokchung aser Zunheboto district tem nung rejutem semdang.
ACCSU-i January 20, 2019 nü Fazl Ali College Mokokchung semdangdang nijatemi college campus telung nung ki yangluba angu. Iba onük atema parnoki college authority, district administration aser state sorkar dang teinyaktsü tim inyaktsü mepishi.
ANCSU-isa state sorkar dang college kimungtem alizüktsü aser college kimung indang survey map shitak renema arrtsü atsüdangtsü atema mepishi.
FAC Mokokchung ya Nagaland nung sorkar college tejentiba lir saka ali dak sendakba tebilemtsütem ajuruba ya state sorkari higher education nung temulung magütsüba sayur, ta ANCSU-isa metetdaktsü.
January 31, 2019 nü parnoki Zunheboto Government College semdanga college ki aser tanga infrastructures reprangdang.
ZGC nung taoba mapang azüngertem, tang tezüngdak kaketshirtem, Principal aser tesayurtem aser union den ajurutepa sensaksemdang nüngdakba infrastructures maliba atema süngmang, ta ANCSU-i ashi.
State sorkari district college tem dak temulung agüja reprangtsüla aser college infrastructures nung terenlok bener aruba den tanga streams tenzüktsüla, ta parnokisa shisem.
February 1, 2019 nü Khelhoshe Polytechnic Atoizu semdangdang iba reju tia kanga mejungi aliba angudang temulung raksa.
State sorkari senzüka yutsüba aser ali kiburtemi tekong meranga noktakba ajanga KPA-i timtem ajurur. Iba reju nung classroom teimba ka nung kichiba aina mali, ki kanga tejen aser transportation service mali, ta ACNSU-isa ashi.
Ali kiburtem ajanga KPA nung terenlok mapa meinyakteter ta osang angashidang kanga aoksar. Kaketshirtemi pei pocket nung sen sarutepa college nung sentsü ateptsü sentong atong saka ali kiburtemi parnok nem sen magütsü tashi iba mapa meinyakdaktsütsü ta tenokdangba agütsübaji tesüngmangtsüka lir. Ali kiburtem/tenlartemi iba tangatetba nung lira, kodaser iba reju renloktsü? Anungji, state sorkari college kimung alizüktsüla aser arrtsü atsüdangtsüla, ta ANCSU-isa metetdaktsü.
Külen, Directorate of Technical Education-i state technical scholarship funds tim mesüi amshia, parnok staff nem personal loans agütsüba aser sen lakh 40 endoka farewell sentong agiba osang angazükogo. Anungji, scholarship sen tim mesüi amshiba ketdangsertem tenüng yimjak nung metetdaktsütsüla aser parnok ozüng kübok merenshitsüla, ta ANCSU-isa takhangba agütsü.
ANCSU-i Education Tour 2019 mezüng shilem agidang bushitetba onüktem rongnung ozüng alema Asst./Assoc. Professor tem attachment mesüra redeployment asüba, contract atema Assistant Professors shimba, tangutsüpur kaketshirtem nem scholarship magütsüba ajitet aser state sorkar dang item onük atema mapa inyaktsü temepishiba agütsü.