Sorkari COVID Cess agientsüla: CPO

Dimapur, Monupii/May 07 (TYO): COVID-19 dak sendakba nung Centre aser state sorkari asen state Green Zone nung yutsüba aser sangdongba sülen Nagaland state telungzük nung aliba senso tajungtem pei yimtsüngi aruner tem nem yimtsüng ketdangsertemi tenokdangba kecha magütsüi arudaktsütsüla, ta Chakhesang Public Organization sangdong ka ajanga ashi.
Health Ministry aser state sorkar totuyuba nung shia aliba ama anempongba maparen aser COVID-19 agi asürtem arempa mapa kanga kümdanga inyakysüla. Aiben mongudangba COVID-19 tashidak wara agi asenok ajak timtemdaktsür aser khuret jenti agütsür, saka kasa mapang Tsüngrem temeim aser taochi asen dang sayuba tali jangjashir, ta CPO sangdong ajanga ashi.
Nüburtem ajangzüktsü mechi state sorkari petrol, diesel aser motor spirit nung COVID cess meshiba ya agientsüla. Tang alima tensa mejungi aliba mapang ‘saru nung saur’ meshiba ya kanga tia maka aser magizüktetla maparen ka lir, kechiaser COVID-19 tashidak wara nungi jenbua alitsü mechi anempongba ajanga nüburtem anogoshi nüngdak tema meperir, ta CPO-i ashi.
Iba ama totzü nung jenjang temlokba ajanga nüngdakba osettsüset nung jenjang temloktsü aser nüburtem dang tali tim atemtsü. Senotsü bendentsü mechi nüburtemi meranga inyakba sen ajunga state sorkari amozüktsü memerangtsüla. Anungji nüburtem ajungtsü mechi state sorkari telemtetba tanaben lepa reprangshitsü ajungshir, ta kasa sangdong ajanga ashi.