Sorkari Dawood Ibrahim anir arutsü: Rijiju

New Delhi, October 27 (Agencies) : Sorkari ozüng alema mapa inyaker tetsüdi Dawood Ibrahim India-i meyipa anir arua 1993 Mumbai bomb lendong atema ozüng tapet agi merenshitsü, ta Union minister Kiren Rijiju-i ashi.

Indonesia nung Chhota Rajan apuba sülen anogo ishika lir Rijiju-i iba osang metetdaktsü.

Home minister Rajnath Singh-i Parliament nung sorkari Dawood anir arutsü atema mapa inyaktsü ta nangzükogo. Pa ya Pakistan nung ISI-i kümzüka yua lir ama temulung melemi bilemer, ta Rijiju-isa ashi.

Osangbenertemi Dawood indang asüngdangdang Minister of State for Home-i iba osang metetdaktsü.

Osangbenertemisa Rijiju dang Rajan kodang Indonesia nungi India-i anir arutsü ta asüngdangdang, Indonesia o India na ozüng khenyongi balala aser iba atema linük ana tsüngda osang agitepdar, ta pai langzü.

“Onoki India aser Indonesia indang ozüng aser linük ana tsüngda tenangzüktep agia alibatem shisadangdar. Tekaratiba nung Chhota Rajan India-i anir arutsü” ta paisa metetdaktsü.

India nung ozüng alema mapa inyaker tetsüdi Chhota Rajan aputsü atema Interpol-i Red Corner Notice ka agüja liasü aser küm 20 tema jenshia aruba sülen Bali, Indonesia nung pa apu.

Dawood Ibrahim den teyariteper tongti ama inyaka arur tatem nung balaka razüka aosang Rajan ya Sydney nungi Bali-i ao ta Australian police-i osang sangoktsüba sülen Indonesia nung apu.