Sorkari Dimapur ya ‘ILP zone’ ta sangdongang: JCPI

Dimapur, August 12 (TYO): Nagaland sorkari lateta aliba ozüngtem yanglushitsü aser ozüng tasentem latettsü mesüra state-i aginüba ama osangtem sangdongtsü temeten aser tashi lir. Iba kasa tashi amer state sorkari Registration of the Indigenous Inhabitants of Nagaland (RIIN) mapa inyaktsüba osang metetdaktsüogo.
RIIN yanglutsü lemtetba sülen Nagaland sorkari July 17, 2019 nü Kohima nung political party tem, kin hohotem aser CSOs den senden ka amen aser idanghi nisung teimbai state sorkar telemtetba mulunga agizük. Anungji, state sorkar-i telemtetba agiba aser kin hohotemi junger ta agizükba dena, Nagaland nung ILP aser RIIN mapa inyaktsü state sorkar dak tashi peria lir, ta Joint Committee on Prevention of Illegal Immigration (JCPI)-i metetdaktsü.
Ajisüaka, state sorkari Dimapur nung ILP mapa inyaktsü atema Cabinet resolution ka dang agiba jagi meperir. Mrs. Banuo Z. Jamir-i aniba commission-i RIIN atema mapa inyakdar aser taküm September ita nung iba mapa metembangsa Dimapur ya ILP zone ka ta state sorkari sangdongtsüla, ta JCPI-isa ashi.
Mapa meinyakba telok kari RIIN anema noktakba nung tatemtsü amer sorkari Dimapur nung ILP mapa atsülanga maotsüla. Nagaland nung ILP mapa tashi itta inyaktsü atema RIIN ya mapa tajung ka lir ta JCPI-i meteta lir anungji telok kari ola adokba atema sorkari metsübutsüla. BEFR of 1873 atema noktaker ajaki RIIN pelaa agizüktsüla, ta parnokisa metetdaktsü.
Shingaia RIIN atema nübortem meratadaktsütsüla. Iba mapa nung non-Naga nunger jangjatsü aser tanga state tem nungi aruba Naga nungertem indigenous inhabitant Nagaland ta züngoktsü atema cut-off date ji December 1, 1963 asütsüla. Nagaland nung Naga nungertem (Kacharis, Kukis, Garos, Mikirs) ya state nung indigenous lir aser parnok atema cut-off date alitsü nüngdak madoker, ta JCPI-isa ashi.
Nisung kari cut-off date ji 1977 asütsü atema rongshir saka sorkar iba ya agizükra JCPI-i odangbo meyutsütsü. J&K jenjang ajema kümtsüba mapang ka nung, ashikülakertemi dang RIIN anema ola adoktsü, ta JCPI-isa metetdaktsü.