Sorkari electric light tajungba yoktsü meranger

Kohima, Dec 18 (TYO) : Alima nung rongsenren renloka inyaktsü aser nübortem libaliro tajungba kümdaktsütsü asoshi electric tashi (power) ya kanga tongtibang .lir, anungji Nagaland sorkari eletric tajungba yoktsü sentong yangludagi ta Nagaland Chief Electrical Inspector, I.V.Chishi-i metetdaktsü.
Tanü Zonal Council Hall, Kohima nung ‘National Energy Conservation Day’ amongba sentong nung jembidang pai iba o ya metetdaktsü. Paisa ashiba agi, Nagaland nung tezülen aliba yimtsüngtem aser sensakertem ajak electric light agi tonga atsüktsü asoshi state sorkari inyakdagi.
” Tangbo state nung electric tashi (power supply) agi meperir, kechiyong light tashi ya nüngdakba dang nungi tajemba angur, aser asenok peria bener arutsübaji tasak aser senotsüa aika aotsü,” ta paisa ashi.
Tanü Hokolbar nü iba anogomong sentong ya  omen ” Save energy by using BEE label appliances” ta asüba nung shisalemsatepa liasü. Iba sentong ya Nagaland State Designated Agency (NSDA) on Energy Conservation aser BEE, Ministry of Power, Government of India na longjemer agia liasü.
Light tashi angutsü asoshi anü (solar), mopong (wind) aser geothermal power amshitsü akoker saka itemji sen aika endoka inyaker aser iba dakji kisüng nendaker alitsüla masü anungji asenok atema teinyaktsü tongtibang kaji light tashi apayua atsüktsüba ya asütsü ta Chishiisa ashi.
” Asenoki asenoksasa asen libaliro, alu ayimba aser industry-tem nung mapa inyakba maparen nung light tashi akok tashi meyaka atsüktsüsa inyaktsüla,” ta paisa ashi.
Light apayua atsükba ajanga light agi meperiba, alima tzü mopong melenshiba aser rongsenren renlokba nung tebilemtsü ajurubatem koka inyaktettsüsa mapang tajung bener arutsür ta Electrical Inspector-isa metetdaktsü.
Linük nung light tashi tajungba amshia aotsü atema Union Ministry of Power-i Bureau of Energy Efficiency (BEE) ajanga kidang aser shishilembadak light tashi ajema atsüktsü asoshi electrical osettem nung May 2006 nungi label ka maloktsür. Iba label maloktsüba jagi iba oset yangluri iba oset amshidang light tashi kobatetka atsütsüar, ibaji teyur.
BEE ajanga electrical osettem nung light tashi koba tashika atsükar, ibaji metettsü atema  petinu noksa agütsür aser petinu noksa teimba aliba oset jagi light tashi tajemba agir, anungji asenokia ibaji meteta tanü asoshi dang masü saka tarutsü putu asoshia electric tashi meyaka agitsü nüngdaker ta Electrical Inspector-isa metetdaktsü.
Paisa ashiba agi, Northeast India nung state ajaklen electric light agi atongba statejibo Nagaland mezüngbuba aser linük nung tanabuba asütsü.
Tang state sorkari nübortem asoshi electric tashi nüngdakba agütsütettsü asoshi bendanga agüja inyakdagi aser iba nükjidongji tongteta inyaktettsü atema  “State Energy Conservation Fund” ka tentetogo aser BEE den külem ser Energy Conservation Act 2001 mapa küma inyaktsü telemtetba agiogo.
Iba kasa sentong nung Kohima Municipal Council ketdangser , Kovi Meyase-i jembidang, state nung electric tashi peria agütsütsü asoshi sorkari merangdang, nübortemia electic tashi ya kanga apayua atsüktsü asoshi kanga khuretsa bilema inyaktsüla ta metetdaktsü.
Nübortem dang light apayua atsüktsü tangatetba agütsütsü asoshi Power department den külemi KMC-ia shilem agia inyaktsü mulunga lir ta Meyaseisa metetdaktsü.
Iba sentong nung BEE Star Label Energy Saving Appliance indang power presentation ka M/s Novotech Environmental Engineering Pvt. Ltd, Kolkata teloki agütsü.
Iba sentong nung menden Metimenla liasü aser Er. P T Philip-i pelaba o metetdaktsü.