Sorkari Enforcement Directorate dangi shidi zülu

Kohima, September 26 (TYO): Tanü Director General of Police (DGP), Nagaland-i Enforcement Directorate (ED) dang Nagaland Chief Minister, TR Zeliang-i ochimashiba sen transfer süogo ta tai tonglokja aliba junga reprangshitsüla ta nenshia metetdaktsüogo.
Kolkata nung ED Zonal Office, Special Director LL Doungel, IPS dangi yokba shidi ajanga ED dang, Foreign Exchange Management Act (FEMA) ozüng kübok sorkari bushisüngdangtsü tuyua aliba nung tang tashi nung kechi bushiteta ali, ibaji Nagaland sorkar dang metetdakjang ta mepishiogo.
February 23, 2015 nüa DGP-i ED dangi yokba shidi ka ajanga, January 15, 2015 nü nisung ka tenüng agi T. Shuya-i Chief Minister aser pa kinüngtsü na anema rongsenkettsüng nung aibelenba Diphupar Police Station, Dimapur district nung benokba den külemi DBS Bank, 6 Sheraton Way, DBS Building, Singapore indang transaction receipt ama reprangtetba ka agütsüsem.
Iba mapang nungji DGP-i, state police-i iba ken oji agizüktettsüsa masü ta shia pai ED dang item kenotemji junga reprangshiang aser bushitetbatemji sorkar nem metetdakjang ta shia liasü.
Ano külen Chief Minister’s Office nung aliba kakettem ajangabo, Singapore nung Chief Minister meyong ki lir ta tai tongloktsübaji tai ta shiogo.
Ano külen tiyazü nung tai tonglokja Chief Minister tenüng menüktsüba atema tenüng menüktsür anema ken o benoktsü atema ozüng amertem den asüngdangya inyakdar, ta Media Cell, Chief Minister’s Office, Nagaland-i kasa sangdong ajanga metetdaktsü.