Sorkari HC obendanger tenüng 77 benokba nungi 34 shim

New Delhi, November 11 (Agencies): Tanü Centre sorkari Supreme Court (SC) dang, linük tesem ajaklen High court balala nung obendangertem atema tenüng 77 benoka aliba nungi tenüng 34 shimogo, ta metedaktsü.
Sorkarisa Chief Justice, T S Thakur-i aniba bench dang, obendangertem shimtsü atema tenüng benoka aliba file tem anüngdaka mali, ta metetdaktsü.
Shiva Kirti Singh aser L Nageswara Rao na dena aliba bench dang Centre atema jembitsür Attorney General, Mukul Rohatgi-i, “Tenüng 77 benoka aliba rongnungi tenüng 34 shimogo aser tanüngba tenüng 43 ji Supreme Court collegium dangi meyipa yokogo,” ta metetdaktsü.
Rohatgi-isa, Centre-i taküm August 3 nü collegium dang Memorandum of Procedure (MoP) draft tasen yokogo, ajisüaka tang tashi sorkari telangzüba agüja mali, ta ashi.
Bench-isa, parnoki November 15 nü CJI den obendanger pezüi akumba collegium senden ka ayongtsü, ta metetdaktsü.
1971 rara nung shilem agir, Lieutenant Colonel Anil Kabotra-i iba onük nung benokba PIL ji maneni November 19 nü angadangtsü, ta metetdaktsü.
Judiciary nung menden tazüngtem atema nübo meshimba atema tamalen Supreme Court-i sorkar aija lir.
Tamalen Court-i, obendangertem shimba anüngdaka ayubaji magizüktettsü aser obendang tekaratiba nung agütsütettsü atema tiyongtsüi ia inyaktsü, kechiyong obendang agütsüba inyakyim chirepdar, ta jembia liasü.
PIL nung Kabotra-i, Ministry of Law & Justice dang HC tem nung obendangertem menden tazüng aliba atema shimtsü asoshi tekaratiba nung meratem agitsüla, ta shia lir.
Kasa temepishiba shidi nung “Linük nung obendangertem menden tazüng atema shimtsüji parnok (Centre) teinyaktsü lir,” ta shia lir.