Sorkari Hombar tashi nomination atsülanger

Kohima, January 07 (TYO): Nagaland nung district 11 kübok Municipal 3 aser Town Council 29 densema urban local bodies (ULBs) 32 nung election agitsü atema tenüng agütsüba anogo tembangaka State Election Commission (SEC) ajanga tenüng kata magütsüi aliba municipal aser town councils atema Hombar nikongdang 3:00 ako tashi tenüng agütsütsü asoshi mapang atsülangtsüogo.
Tanü nikongdang Kohima nung State Election Commissioner, Sentiyanger Imchen-i sangdong ka nung, “Tetsükdaktsü kar, tenokdangba, aser tanga amokmeren ajanga election nokdangba agi municipal aser town councils kar nung nomination file mesütet, ibayongji tenüng agütsütsü tejangrar candidate tem nem ano maongka agütsütsü asoshi mapang atsülangtsü mepishi. Commission-i ibaji asadangba den külemi Returning Officers aser District Administration nungi osangolaba sülen iba temepishiba agizük,” ta metetdaktsü.
Anungji December 21 nü metetdaktsüba election programme nung temelenshi lia SEC-i Municipal aser Town Council atema nomination file asütsü asoshi asüng general holiday (Deobarnü) medeni January 9 nikongdang 3:00 ako tashi mapang atsülang, ajisüaka election atema tanga sentongtem nungbo temelenshi mali, ta sangdong nungsa shia lir.
Iba dak sendakba nung osangbenertem den jembidang Sentiyanger Imchen-i, anogo atsülangbaji tenüng kata magütsüi alir Municipal aser Town Council tem atema dang lir, ta jangjatsü.
Paisa, iba dak alia joko anogo matsülangtsü, ta shisem.
Tanü tashi nung tenüng kata agüja malirtemji Kohima Municipal Council, Mokokchung Municipal Council, Kiphire Town Council, Tuensang Town Council, Mon Town Council aser Changtongya Town Council nungertem lir.
Iba dak alia Imchen-isa, yashi Mokokchung Municipal Council aser Chumukedima Town Council nung Returning Officers-i nomination file asütsü atema tesem melenshitsü asüngdang aser lemzükja aliba tesemtem nung tang tensa apir Kohima Municipal Council, Changtongya aser Medziphema danga kasaji mepishiogo, ta metetdaktsü.
Peipei tesem nung Returning Officers-i asadanger mepishiba apir tesem melenshitsü atema SEC-i melaogo.
Paisa, nomination file asutsü atema tesem melenshiba osangji candidates aser nüburtem nem jelia metetdaktsütsüla, ta shisem.