Sorkari Hornbill Rock contest anentsü telemtetba agi

Kohima, August 28 (TYO): Nagaland sorkari taküm nungi Hornbill International Rock contest magitsü telemtetba agiogo.
Küm shia Hornbill Music Festival nung Hornbill International Rock Contest ya sentong tongtipang ka liasü.
2004 küm Hornbill National Rock Contest ta ser iba tetoktepba tenzük aser linük nung rock contest rongnung senpet teimtiba agütsübaji iba tetoktepba ya liasü.
Bodbarnü Task Force for Music and Arts (TaFMA) Advisor, Theja Meru-i osangbener den jembidang iba tetoktepba taküm nungi magitsü osang metetdakja liasü.
Küm 15 tashi Hornbill International Rock Contest munga aruogo saka taküm nungi magitsü. Iba melena “The Great Hornbill Rock” agitsü aser iba nung anogo ishika Ticket to Hornbill nung takokertem nem bendanga agütsütsü, ta pai ashi.
Hornbill Music Festival ya Music Festival temeja ka kümdaktsütsü atema iba telemtetba agiogo aser event management company kati anogoshia kentenba sentongtem anepalua agitsü, ta Theja Meru-isa shisem.
Chief Minister Neiphiu Rio-i local musicians nem maongka aser sabang peria agütsütsü atema asalentong atongba nung TaFMA-i September 27 nü Ticket to Hornbill kübok state ajungalen band audition alitsü, ta paisa metetdaktsü.
District shia nung takokertemi Hornbill Music Festival nung shilem agitsü maongka angutsü aser Ticket to Hornbill ya linük nung yimti kar shimteta agitsü, ta paisa ashi.
Iba maparen atema TaFMA-i Gibson Guitar India, Rolling Stone India aser Hard Rock Café teloktem den tesentaktep yangludar, ta Theja-isa ashi.
Hornbill Music Festival atema tongti tesemji Dimapur asütsü aser Kohima nunga tesem balala nung kenten sentongtem alitsü. Iba indang osang tejangja aketba brochure ka yakta sayatsü, ta paisa shisem.
September 27 nü TaFMA-isa district ajak nung Nagaland Choir Olympics Audition agitsü aser final sentongji October 23 nü Regional Centre for Music, Entertainment and Performing Arts nung agitsü.
Final sentong agiba sülen maneni auditions alitsü aser sangküm Belgium nung 11th World Choir Games nung shilem agitsü atema merangtsü ta Theja Meru-isa metetdaktsü.