Sorkari Hornbill Rock Contest atema jangjashitsür

Dimapur, November 19 (TYO): Media Cell, CMO Nagaland-i October 30, 2017 nü Hornbill Festival 2017 dak sendakba sangdong ka agütsüba nung, ‘state yimtiba nung traffic aser security khuret aliba ajanga Music Rock Events ji Agri-Expo, Dimapur nung amungtsü belener’ ta zülusemba ajanga telok/kijatem temulung yirutsüogo saka iba ya aibelena ajensemba dang lir aser iba atema kanga sasar, ta Chief Minister’s Office-i tanü sangdong ka nung metetdaktsü.
State yimtiba nung traffic ya tayongzükba tulu ka lir saka Police den Kohima nung alirtemi yaritepa iba khuret kokteta arur. Tesüiba küm 17 tashi sensotem, lanur teloktem aser talisa APO, AMK, ASU, AYO, KVC aser KVYO nungertemi Hornbill Festival nung yaritepa aruba atema state sorkari kanga pelar, ta CMO sangdong nungsa metetdaktsü.
Music Rock sentong tesem belena agitsübaji tanga district temi aginüba nung ajemdaker telemtetba agi. Parnokia Hornbill Festival nung shilem ka sünür aser tesem belena agiba ajanga tourist temia Nagaland kübok tanga district tem angutsü. Iba tangatetba nungji ajemdaker sorkari taküm asoshi Dimapur nung alitsü lemtet aser iba sülen tanga district tem nunga belena amungtsü, ta sangdong nungsa shia lir.