Sorkari IGNCA trust ketdangsertem melenshi

New Delhi, April 14 (Agencies): Brihostibarnü Centre sorkari Indira Gandhi National Centre for the Arts (IGNCA) trust nung Tir atema senior journalist, Ram Bahadur Rai shimogo.
Narendra Modi’er sorkari Nehru Memorial Museum Library Society (NMMLS) ketdangsertem shimshiba sülen küm ka lir tang IGNCA ketdangser melenshir. Yaküm April ita nung sorkari NMMLS ketdangser melenshia liasü.
Taoba mapang Hindi osangkaket, Jansatta yimozülur, Rai-i Chinmaya Gharekhan mapa melenzüker. Culture ministry sangdong ka ajanga, ketdangser tasen melenba ya tang nungi mapa küma aotsü, ta metetdaktsü.
Board tasenba ajanga Indira Gandhi National Centre for Arts tali nüngtuguba akumtsü ta sorkari shiaka Congress-ibo iba atema aitsüogo.
Tang Board nung shimba züngsem 19 rongnung tsüngsanger, Sonal Mansingh, Bollywood lyricist, Prasoon Joshi aser artist Vasudeo Kamath nunger densema lir.
Board züngsem tasen rongnung Chandraprakash Dwivedi, Nitin Desai, K. Arvinda Rao, Mahesh Chandra Sharma, Bharat Gupta, M. Seshan, Rati Vinay Jha, Nirmala Sharma, Harsh Neotia, Padma Subrahmaniam, Saryu Doshi, D.P. Sinha aser Viraj Yagnik nungera lir.
Culture Minister, Mahesh Sharma-i, tang tasen shimertemji kanga tetemsü nisungtem lir, ta ashi.
“Ram Bahadur ya kanga nüngtugu journalist ka lir aser tetemsü lir. Parnok ama ka ajanga institute ano tali nüngtugu akumtsü,” ta minister-isa ashi.
Ajisüaka Congress lenir, Anand Sharma-i, “Iba ya, junga amenteta aliba reju ka raksatsüba mera lir,” ta aitsüogo.
“Iba ya onoki sashia aitsür, kechiyong tamalena parnoki yama ya inyakogo. Iba ya sorkar atema nükjidong onük ka dang masü saka parnok tsurabur RSS indang onük lir,” ta Sharma-i ashi.
IGNCA ya 1985 küm November 19 nü taoba mapang Ato kilonser, Rajiv Gandhi-i la tetsü aser tesüiba mapang Ato kilonser, Indira Gandhi nüngtem nung tenzükja liasü.