Sorkari Industrialist tem mekangshitsüla: Mamata Banerjee

Kolkata, January 09 (Agencies): West Bengal Chief Minister Mamata Banerjee-i lar sorkari industrialists tem den tebilemtsü adokdang angatettepa inyaker, ta ashi.
Ozü sorkaribo industrialists tem kodanga mekangshitsü ta ashiba mapang, lai, linük nung aliba state sorkar ajak dang industrialists tem nem lenmang sadema lapokjang aser ki nüngpoka oa tax tali meshia mekangshitsüla, ta ashi.
“Kü dak tashi liaka anogo shia ki nungpoka oa tax memeshi, kü dak tashi aliba mapang ni tashiyim benshitsü menüngdak. Asenoki business inyakertem den amalitepa inyakyimtsü tim aser parnok nem lenmang sadema yutsütsü nüngdak,” ta Banerjee-i ashi.
“Ni sorkar ajak dang industrialists tem ajanga linük nung sen yimdakjang ta shiner,” ta lai ashi.
Chief minister-isa, “Asenoki tashiyim benshiba ajanga tenüng menük bener arutsü aser kong tenüngmenük lidir akhümtsübutep samar. Akhümtsübu samara ajak samar,” ta ashi.
Ajisüaka Banerjee-i industrialists tem kangshiba aser ozüng alema amshiba sen na tsüngda tepila rateta ashi.
“Ozüng alema amshiba sen yabo industrialists tem dang kangshia meshiba sen den balala lir. Nenoki ozüng alema amshiba sen kolen nungi südir süaka sarudena terenlok mapa asoshi amshira onok tepelaba asütsü,” lai ashi.
Aji oda süaka industrialists temi meyimlaba nüngdak kar aser parnok den inyakertem asoshi sen talila terarabo teti yua alitsü nüngdaker, ta laisa ashi.