Sorkari inyakba mapa tendangtsü mapang tongogo: CJI

Jammu, February 28 (Agencies): Sorkari ozüngtem benoktsü menoba aser High Court obendangertem shimtsü menoba dak sentakba nung Chief Justice of India (CJI), T S Thakur-i, sorkar mapang tendangtsü mapang tongogo, ta ashi.
Obendangertem shimtsü temepishiba benokba sülen menoa meshimba atema aija Thakur-i, nisungtem tepoukdak timtemtepdang aser ochi temeten atadang sorkari ita ana dak tema kecha meinyaki mekazütsüla, ta ashi.
Honibarnü Jammu nung anogo ananü indang legal seminar lapoktsüba sentong nung jembidang Justice Thakur-i, “Iba ya atangji nisungtem temeten kümzüka ayutsü atema nenoki benoktsü atema yangluba ozüngtem lir. Court-i inyakbaji nija konang-nüngsang atema masü, iba ya item ozüngtem benoktsü asoshi lir. Ni ano mejangja saka sorkari inyakba nenoki tendangtsü atema mapang tongogo,” ta ashi.
Obendangertem shimba dak sentakba nung pai, shima alirtem shilem 50 bo tesüiba ita ana tashi sorkar atadar, ta ashi.
Obendangertem shimba inyakyim nung sorkari menoba dak sentakba nung pai, “Tang judiciary inyakyim nung nisung tesadang shi tepoukdak timtemtepdar, nisungtemi ochi temeten atema ayimtener, High court Chief Justice aser high court nung senior obendangertemi tetemsü nübo shimogo, inyakyim nung chief minister aser Governor ajanger law ministry tongogo, IB-i agizükogo, Supreme Court, Chief Justice aser tanga senior obendangertemi repragogo aser metemsüi alibatem shimtoker tetemsü candidate tem benokogo,” ta ashi.
“Temepishiba benoka aliba nung sorkari kechiba menor’ar ni angateter,” ta pai ashi.
Thakur-i ashiba agi, linük nung aliba high court tem nung obendangertem ajema alibayong nüburtem nem obendang agütsütsü menor, saka tang tashi benoka aliba obendangertem sorkari magizük.