Sorkari ita shia Netaji indang file 25 sangdongtsü

January 23, 2016 nü New Delhi nung Ato kilonser Narendra Modi-i taoba mapang India nüjiso atema rarar, Netaji Subhash Chandra Bose indang kürakyanglu nung naro tokja akhüm agütsüba noksa nung angur. Noksa nungsa Minister of State for Culture (Independent Charge), Tourism (Independent Charge) & Civil Aviation, Dr. Mahesh Sharma-a angur.

New Delhi, January 23 (Agencies): India nüjiso atema rarar, Netaji Subhash Chandra Bose indang miimbanga aliba kulikaket 100 shi tanü Honibarnü digital version nung sayaba sülen sorkari, parnoki maneni ita shia Netaji dak sentakba kulikaket 25 sangdongtsü, ta metetdaktsüogo.
“Item kakettem nung alibatemji nüburtemi metetner. Ato kilonseri item kaketji kanga ladaka sayaogo. Ita shia onoki iba ama kulikakettem 25 sayatsü,” ta Union Minister for state for culture & tourism, Mahesh Sharma-i ashi.
Iba dak sentakba nungsa Bharatiya Janata Party (BJP) lenir, Siddharth Nath Singh-ia, “Ato kilonser Narendra Modi kübok teladak inyakyim tenzükogo. Iba ya linük asoshi aser democracy asoshi temaitsü tajung ka lir. Tatemsa pa asüba kuli memeteti aliba jungkai adoka metettsü. Tanü linük nüburtem kanga pelar,” ta ashi.
Singh-isa, tanü tashi nung Congress-ibo iba onük atema meinyaki liasü, kechiyong parnoki lendong tsübua liasü, ta ashi.
Maneni Union minister of state for urban development, Babul Supriyo-ia, “Iba ya tetenzükba tajung ka lir. Kanga jangratemtsütem lir. Item kulikakettem ya kechiba nüburtem dang nungi mimbanga liasü (?) ibaji langzütsü onoki akhanger. Netaji indang takum otsü nung research agir puti otsü zülurtemi aika jungkai adoka ashitsü ta ni imlar. Ni Ato kilonser  Modi dang pelar. Iba ya ajanga Netaji Subhas Chandra Bose indang otsü miimbanga aliba metettsü,” ta ashi.
Honibarnü Netaji Subhash Chandra Bose asoba anogomung nung National Archives of India nung Ato kilonser Modi-i Netaji dak sentakba miimbanga aliba kulikaket 100 sayaogo.