Sorkari Kashmir onüktem atema junga meinyaker: VHP

New Delhi, July 15 (Agencies): Tawa Kashmir nung kiralongrartemi Amarnath temeshi aini aoertem amakba tatalokba aija Vishva Hindu Parishad (VHP)-i, iba tatalokba ajanga Kashmir onüktem atema sorkari junga meinyakba sayur, ta ashi.
Right-wing Hindu tentet VHP-isa, VHP aser Bajrang Dal züngsem 10,000 dak tema Kashmir tesem balala nung adenshia army tem ajungmesotsü, ta metetdaktsü.
Osangbenertem senden ka nung jembidang VHP Konkan region tongti lenir, Shankarrao Gaikar-i, “Kiralongrar aser jihadist temi asen linük ya raraba tesem ka kümdaktsüogo. Linüki Kashmir nung operation tenzüka tai maket nisungtem tepseter jihadist samatsütsü mapang tongogo,” ta metetdaktsü.
“Sorkari Kashmir onüktem atema junga meinyakba kuli tejangja angur. Asenok full- time defence minister mali. Tawa Home Minister (Rajnath Singh)-i, kiralongrartem samatsütsü atema Army nem tashi agütsüogo ta jembi. Ajisüaka tang kashi kechiba army tem nem tashi sadema magütsür?” ta pai asüngdang.
Paisa, sorkari Kashmiri Muslim nungertem armed forces nung manioktsüla, ta ashi.
“Sorkari Jammu & Kashmir police department nung Kashmiri Muslim nungertem manioktsüla aser Indian armed forces nung manioktsüla. Iba inyakyim ya manenra yangji long agi asen sepaitem mezüngmeshirtemji kenü anogobo armed forces nung adentsü, aser parnoki linük anema apusotsü,” ta Gaikar-isa ashi.
Madrassas ji kiralongra tamendakdak lir, anungji Kashmir nung itemji shibangtsütsüla, ta paisa ashi.
“Kashmir nung madrassas ajak shibangtsütsüla. Itemji kiralongra tamendakdak lir. Madrassas nung tanurtem nem laptops agütsüra, item laptops ji junga reprangdangtsüla, kechiyong tanur aser tesayurtemi ibaji kechi atema amshiar nisung shingaia memetet,” ta pai ashi.
Paisa, BJP sorkari Hindutva mapatongtem nung ajemdaker inyaksüla aser linük ajungtsü atema linük Temzüng nungi Arrla 370 (J&K state nem maongka balala agütsüba) agientsüla, ta ashi.
“Kobi melii VHP aser Bajrang Dal züngsem 10,000 shi Kashmir nung kiralongrartemi kongshiba tesemtem nung adenshia Army tem ajungmesotsü,” ta paisa metetdaktsü.