Sorkari kerosene aser LPG nung subsidy agütsütsü

New Delhi, July 13 (Agencies): Centre-i kerosene litre shia sen 12 subsidy agütsütsü aser LPG atemabo noklang nung noklang subsidy agütsütsü telemtetba agiogo, ta tongti ketdangser kati ashi.

Linük meyong totzü retailers nem kerosene litre shia finance ministry-i sen 12 subsidy agütsütsü aser retail price o ‘cost of production’ na tsüngda metongsembaji ONGC ama company tulutemi agütsütsü, ta ketdangserisa ashi.

Tang totzü company temi kerosene litre ka nung sen 18 agi akoksar ayoker. Iba nungji Centre-i litre shia sen 12 inoktsütsü aser tanüngbaji company tulutemi inoktsütsü.

Centre-i LPG atemabo cost of production o retail price na tetsüngda adokba sen noklang nung noklang subsidy agütsütsü. 2015-16 budget nung LPG atema sen crore 22,000 inoka lir aser kerosene atema sen crore 8,000 inoka lir.

“Kerosene atemabo peritsü saka LPG atemabo ano inoksemtsüsa akümtsü,” ta ketdangserisa ashi.