Dimapur, March 2 (TYO) : Nagaland nung NPF-i aniba BJP-DAN sorkar aruba sülen Chakhabama nungi Kohima tashi gari lenmang anepalu masür aser tang joko iba lenmang ayong ka ama kümogo, ta NPCC Tir, K. Therie-i sangdong ka nung metetdaktsü.
Iba lenmang ya Zunheboto, Phek aser Kiphere district tem sendakteper aser lenmang junga alidang iba lenmang nung minute 30 nungi 40 tsüngda agia aliba tangbo ghonda 2 nungi 2 ser tesadang shi agir, ta Therie-isa sangdong nung ashi.
Iba lenmang ya British nungeri yimsüsüba mapang nungi amshi aser Zunheboto, Phek o Kiphere district tem atema kanga tongtipang lir. Lenmang anepalu mesüi toktsübaji item district nungi shimteta aliba MLA tem mezüngmeshiba inyakyim ka lir.
Lenmang majungba ajanga rongsenkettsüng tsütsü tetsükdaktsü ajurur aser nübortem timtemer. Sorkari iba lenmang yanglutsü atema sen agütsür alitsü akok saka tim mesüi amshiba aser ochimashi ajanga lenmang iba tia nung lir. Anungji anogo 30 tsüngda bangdak department temi mapa meinyakra, onoki temeten angutsü atema mapa inyaktsüsa akümtsü, ta NPCC tirisa metetdaktsü.
You must be logged in to post a comment Login