Sorkari linük tesem ajaklen ‘One Stop Centres’ 660 amenoktsü

New Delhi, July 30 (Agencies): Nirbhaya fund nungi senotsü agi yaria scheme ka kübok ozüng alema tetsürtem anema inyakba balala agi konghsir tetsürtem nem medical, legal aser psychological teyari agütsütsü atema sorkari linük tesem ajaklen One Stop Centres (OSCs) 660 amenoktsü nükjidong lir, ta Lok Sabha senden nung metetdaktsü.
Women & Child development Union Minister, Maneka Gandhi-i, iba scheme ya mezüng yaküm April 1 nü tenzüka liasü aser iba mapang  linük tesem balala nung OSCs 17 amenoka liasü, ta ashi.
Mezüngbubaren nung iba scheme takok ngua inyakba sülen ano sangküm April ita tashi nung OSCs tali 150 amenoktsü atema inyakdar, ta lai ashi.
“Nüngdak dang süra linük nung One Stop Centres 660 amenoktsü onok nükjidong lir,”  ta laisa metetdaktsü.
Senden nung Question Hour mapang Maneka Gandhi-i, iba scheme kübok ozüng alema inyakba balala agi kongshia alir tetsürtem nem medical teyari, police teyari, legal teyari, psychological counseling aser khen atema tejenokdak agütsür, ta metetdaktsü.
Management Committee-i item Centres achaayangtsü aser iba Committee nung tekolakji District Collector mesüra Deputy Commissioner tem asütsü, ta lai ashi.
Minister-isa, linük nung tetsürtem dak sentakba ken o tem tekaratiba nung bentettsü atema fast-track courts amenoktsü atema lai Law Minister dang ashitsü, ta metetdaktsü.