Sorkari Maoists telungpur azüoktetogo

New Delhi, October 02 (Agencies): Maoists telungpur rara nung 2010 küm nisung 1005 tashi asü saka takümbo tang tashi nung Maoists rara nung nisung 167 dang süogo, aser iba ya ajanga sorkari, tangbo parnoki Maoists telungpurtem azüoktetogo, ta jembiogo.

Taküm September 15, 2015 nü tashi nung Economic Times (EC)-ia asadangtetba agi, takümbo Maoists-i security sepaitem amakba shilem 25 ajema kümogo, Maoists ‘people’s court’ 28 dang liasü aser arms training camp 34 aliba nungi 11 dang kümogo.

ET den jembidang Home minister Rajnath Singh-i, sorkari mapatong balala ajanga takok ngudagi aser Maoist lenirtem tashimait kümogo, ta ashi.

Singh-i, “Ozü sorkar kübok Maoists rara nung yiruba aser asüba shilem 35 ajema kümogo. Maoist lenirtem aser züngsemtem jenjang tamajungba aser tashimaitba kümogo. Linük nung Maoists anema inyaktsü atema NDA sorkari mapatong tasen benok,” ta ashi.

Ajisüaka ano külen taoba Union home minister, P Chidambaram-ibo, iba takok ya UPA ajanga lir, ta ashi.

ET den jembidang Chidambaram-i, “UPA’er mapatong den külemi Integrated Action Plan ajanga 2010 küm Maoists rara tamajungtiba aliba nungi kanga ajema kümogo. NDA sorkari maneni iba mapatong inyakra aser Maoists rara taliba ajema kümra, ni pelar. 2010 küm nungi tenzüker Politburo aser Central Committee züngsemtem apuba reprangdangang,” ta ashi.

Iba onük atema inyaker tongti ketdangser kati, 2010 küm nungi tang tashi nung CPI(Maoists) Politburo aser Central Committee züngsem 20 puogo. Ibaji Maoists committee tultuba ana nung züngsem tesadang ka shi lir, ta shi.