Sorkari mera talila agitsü mulunga lir:Modi

New Delhi, Feb. 16 (Agencies): Ato Kilonser Narendra Modi-i, tan parliament nung budget senden amendang ni aniba sorkari mera talila agia tebilemtsütem lemsateptsü mulunga lir, ta Mongulbarnü ashi.
Party ajaki parliament süngjema amentsü asoshi jembiogo, ta February 23 nü nungi amentsü aliba budget senden süngjema agitsü mechi Modi-i ayongba senden ka nung amenba sülen osangbenertem den jembiba mapang Parliamentary Affairs Minister M. Venkaiah Naidu-i ashi.
Ato Kilonseri iba senden nung pai aniba sorkari tebilemtsü ajak nung mera talila agitsü mulunga lir ta ashiba Naidu-i metetdaktsü.
Modi-i, tan parliament budget senden nung party ajak tangatettep ka ser kanga süngjema agitettsü amanger, ta ashi.
Modi-i ayongba senden nung opposition teloktemi Jawaharlal Nehru University aser Hyderabad University na tebilemtsütema benoka jembia liasü, ta Naidu-i ashi.
Iba dak sentakba nung Modi-i, ni party ka atema dang Ato Kilonser masü saka linük rangben asoshi Ato Kilonser ka lir anungji opposition-i benokba tebilemtsütem atema sorkari mera tapet agitsü, ta kasa senden nung ashi.
Modi-i, iba tebilemtsü telungi ia jembir külen sorkar telemtetba ka agütsütsü, ta shisem.
Iba senden nung telok karibo JNU kaketshir tanisher kati ozüng anema benshiba atema kechi ashir ta asüngdangogo, ta Naidu-i ashi.
Finance Minister Arun Jaitley-i, kanga tim masüba yimyim kar ayimogo aser ibaji bushisüngdangdar anungji iba osangji atadi, ta ashi.
Hokolbarnü Jawaharlal Nehru University Students’ Union nung Tir Kanhaiya Kumar pua ayuba sülen JNU kanga mepelai lir.
February 9 nü JNU kaketshirtemi Parliament amaktsü meranger Afzal Guru aser Jammu Kashmir Liberation Front co-founder Maqbool Bhat na alenseta südaktsüba bilemteta amungtsü ayongba sentong nung India anema yimyim kar ayimba ajanga iba tebilemtsü adok.