Sorkari Mid Day Meal atema tanur tenüng tali lakh 3 dak tema agütsü

Kohima, March 19 (TYO): Centre-i teyari agüja inyakba Mid Day Meal (MDM) scheme kübok senotsü tali angutsü atema Nagaland sorkari Sarva Shiksha Abhiyan yongsük dang nungi tanur lakh 3 dak tema agi tenüng tali agütsü ta tai tongloktsüogo.
Iba osang ya Comptroller & Auditor General (CAG) of India-i March 31, 2015 nü tembangba Social, Economic Revenue & General Sector of Nagaland osang nung metetdaktsü, aser ibaji tanü Chief Minister aser Finance incharge, T R Zeliang-i State Assembly nung benok.
Central Sponsored Scheme indang National Programme of Nutritional Support to Primary Education dang ya MDM Scheme ta ajar aser iba ya enrolment, retention aser attendance den külemi school tanurtem nem chiyungtsü tajung agütsüba ajanga primary education tajungba akümtsü nükjidong nung 1995 küm August ita nung sorkari tenzüka liasü.
Ajisüaka CAG report ajanga, item tongtibang onük asemprong- scheme benokba, senotsü junga achaayangba aser junga ketdangsüba nung tashimait liasü, ta ashi.
CAG-i ashiba agi, state sorkari 2010-15 nung MDM scheme kübok senotsü tali angutsü atema SSA figure dak tali tanur 3,50,858 zülusem.
CAG-isa, district pezü – Kohima, Dimapur, Mon aser Tuensang district tem nung tanur tali züluoksembaji nisung 2,02,515 liasü.
MDM Annual Work Plan & State Government Budget na medemdangra, tenüng züluokba tanurtemji 12,79,792 liasü, ano külenbo District Information System for Education (DISE) osang nung ajemdaker School Education Department record aser SSA-i agütsüba Unified DISE nung tenüng züluokba tanurtemji 9,28,934 dang lir, ta CAG-i ashi.
CAG-i ashiba agi, India sorkar dang nungi jang aser senotsü tali angutsü asoshi Department-i MDM inyaktsü atema nüngdakba dang nungi tali tanurtem tenüng agütsü.
CAG-i tanurtem tali agütsüba indang osang metetdakjaka item mapang nung MDM atema Centre sorkari senotsü tali kwi agütsür’ar iba osangjibo parnoki agüja mali.
CAG report ajangasa, 2010-15 kümtem atema Centre-i sen crore 153.05 agütsü saka state sorkari Department nembo sen crore 131.93 dang agütsü, aser ibaji crore 21.12 crore agi mabensar, ta tai tongoktsü.
Iba dak alia state sorkari 2012-15 atema parnoki agütsütsü lemzükba sen crore 7.05 magütsü.