Sorkari Mobile Phone tem yanglutsü asoshi mapa lateta yutsütsü

New Delhi, April 28 (Agencies) : Linük nung Mobile phone tem sen dalang agi yanglutsü asoshi maongka lapoktsütsü mechi nung Ministry of Electronics & IT mobile phone tem yanglutsü asoshi mapang lateta yutsütsü renemogo. Iba ama mapang lateta yutsüba ajanga handset aser iba dak sendakba osettem nung tax tsütsü anisüngzük alutsü.
Iba osang ya ministry nungi ketdangser tejen kati osangbenertem dang metetdaktsü.
Iba ama inyakba ajanga linük nung mobile phone tem yangluba tsütsü sorkari bendanga agüja inyakba sayur.
“Phased Manufacturing Programme (PMP) ya Ato Kilonser Narendra Modi-i tenzükba ‘Make in India aser Digital India’ inyakyimtem asoshi otsüsütsü inyakyim ka asütsü. Iba den anitepa PMP – II-a küm asem tsüngda nung tenzüktsü aser ibaji ajanga oset yangluba tsütsü shilem 39 nungi 50 tashi ajungkettsü,” ta Indian Cellular National Tir, Pankaj Mohindroo-i ashi.
Iba inyakyim ajanga mechanics taa, die cut parts, microphone aser receiver, key pad, USB cable, camera module, display assembly, touch panel, ringer amala osettem ajak nung sen talila agütsütsü aser sen jenjang ataktettsüba nung mapang lemdanger tali sanga oa inyaktsü.
“Iba ya tagitsü tajung aketba tongtibang sentong ka lir, koba ajanga mobile phone aser iba dak sendakba industry-a automobile industry den saku kümdaktsütsü,” ta Mohindroo-i ashi.
Mapang lateta yutsür oset yanglutsü sentong ya industry aser sorkar – Fast Track Task Force na senteper benok. MeitY kübok tenzükba panel yagi 2019 küm tashi nung mobile phones million 500 yanglutsü aser 2019-20 tashi item mobile phone tem rongnung million 120 tashi bendanglen ayoktsü nükjidong lir. Parnoki küm shia handset sen lakh crore 1.5 nungi 3 alang yanglutsü tebilemba lir.
2015 nungi 16 tashi nung 54,000 crore aliba 2016 nungi 17 tashi India nung yanglutetba mobile phone tem ajanga sen 90,000 crore atongtsü.