Sorkari Municipal Act yanglushitsü bilemdar: CM

Kohima, June 15 (TYO): Brihostibarnü Nagaland Chief Minister, Dr. Shürhozelie Liezietsu-i, state nung Urban Local Bodies election junga agitettsü atema state sorkari Nagaland Municipal Act yanglushitsü tebilemba lir, ta metetdaktsü.
Tanü Reziekie Kohima nung Kohima Municipal Council (KMC) building tasen yanglutsü atema lung azüngtsüba sentong nung jembidang pai iba o ya metetdakja liasü.
“Iba ozüng yanglushiba dang masü, saka sorkari iba Act ajunga tanaben yanglushitsü atema shisadangdar,” ta CM-isa metetdaktsü.
2001 küm State Assembly nung Nagaland Municipal Act agizükdang tetsürtem nem menden shiteta yutsütsü dena maliasü, iba sülen mezüng election ji 2004 küm agi, saka Indian Temzüng yanglushiba den külemi State-ia 2006 küm Act yanglushi, aser 2006 küm tetsürtem nem menden shilem 33% shiteta yutsütsü inoksem, ta paisa ashi.
Ajisüaka Hoho balala aser lokti tentet balalai iba anema nokdakba ajanga state nung Urban Local Bodies election magitet, ta paisa metetdaktsü.
Iba election junga agitettsü dak sendakba nung CM-i, “Iba ozüng yanglushiba dang masü saka Act rangben yanglushitsü nüngdak, ta sorkari shisadangdar, ajisüaka tang tashi nungbo telemtetba agia mali,” ta metetdaktsü.
Chief Minister-i ashiba agi, nüburtemi sorkar dang nungi terenlok balala imlar, ajisüaka lokti nung tesünep melira terenlok alitsü makok.
Paisa KMC Administrator aser staff tem dang, tarutsü nung KMC ya tatishitsü tajung agiba municipality ka aser terenlok ajak atema centre ka asütsü atema inyaktsü ajungshi.
KMC building yanglutsü lung azüngtsüba tesem dak sendakba nung Chief Minister-i, Kohima ya Nagaland nung mezüngbuba jila lir, aser 1878 küm British nunger arua iba jila agiadok, ta metetdaktsü.
Paisa ashiba agi, Kohima tongbangji Japan nunger atema tongtibang ka liasü, aser iba tongbang ya 1944 küm June 22 nü tembang.
Paisa, iba jila ya küm 138 jungogo, aser tanabuba World War nung iba jila rangben raksaja liasü; 1980 küm jila atema shimba tesem (Reziekie Kohima) ya anentsüh agi kanga mejungi raksatsü, ajisüaka sorkar aser nüburtemi kanga meranga inyakba ajanga tangbo iba tesem ya kanga tashi itta kümogo, aser tang tesüsa yangi Kohima Municipal Council building tasenba yanglutsü, ta metetdaktsü.
Chief Minister Dr. Shurhozelie Liezietsu-isa lokti dang, iba building atema nüngdak dang süra ano senotsü tali agütsüsemtsü, ta metetdaktsü.
Kasa sentong nung Municipal Affairs Parliamentary Secretary, R Tohanba aser KMC Administrator, Kethosituo Sekhose natia jembia liasü.
Iba sentong ya Kohima Deputy Commissioner, Rajesh Soundararajan IAS leniba nung agi aser BMC Sr. Pastor, Rev. Moa Longchari-i sarasadema liasü.