Sorkari Naga sobaliba aser yimsüyimpong wazüktsü meranger

August 2, 2019 Tsüngremmung sentong nung tetushi tejaoker Minister G. Kaito Aye den par külem medemer kar densema sorkar ketdangsürtem aser Ao Senden lenirtemi shizüngzü atsüba nung shilem agiba noksa nung angur. Mokokchung, August 2, 2019.

Mokokchung/Dimapur, August 2 (TYO): Nagaland sorkar den yaritepa Ao Senden aser Mokokchung district administration-i achaayanga yashi nungi tenzüka anogo asemnü atema Mokokchung Imkongmeren Sports Complex nung Tsüngremmung sentong tulu ka ayongzüka takok ngua mungdar.
August 2, 2019 sentong nung tetushi tejaoker, Nagaland Agriculture & Co-operation Minister, G. Kaito Aye-i jembidang, iba benjung ayongba den asenok ajak yangi adenba ajanga asen yimsüyimpong wazüka ayuba den ibaji ajungkettsüba nung shilem agir, ta ashi.
State sorkaria asen Naga sobaliba aser yimsüyimpong samaa moudaktsütsü asoshi wazüka aser rizünga ayuba den ajungshiba mapatong balala inyaktsü meranger, iba dak sentakba nung tawato itemji rizünga ayutsü asoshi luden ka shimtetogo, ta paisa ashi.
District balala nung kin balala benjungbentsü den külemi Nagaland tourism department-i achaayanga mini hornbill benjung ya ayongzüka amunger. Ibai tongtibangsa asen tera (roots) mamatoktsü aser mesamadaktsütsü aser lanurtem nem pei sobaliba senmang amangdaktsütsü nükla nung ayongba maparen ka lir, ta pai ashi. “Iba ama benjung amungba ajanga asen kin maitsü aser asenok taküm aliba sayur”, ta paisa shisem.
Akhi mapang nungi asenoki benshia aruba takar sobaliba aser yimsüyimpong tajungtemji wazüka ayutsübaji kanga tongtibang aser maneni benshia aotsüla aser benshia aotsübaji arok khuret asütsüla, ta paisa ashi. Sobaliba senmang, yimsüyimpong, kentenmenü aser yartsüngsang itemji ajanga asen tetsü tebou tendak aser parnok libaliruba indang noksa sayur aser ibaji asen maitsüji lir, ta paisa shisem.
Nagaland Chief Minister N. Rio lenisüba nung PDA sorkari Naga yimden tebilemtsü atema ya anibelem jenti agia apu latsüba maparen balala inyakdar, aji oda, pei atema dang bilemba mesüra pei kin-kidong atema dang bilemba shisatsü alinungbo asenoki aginüba ama telemtetba tajung magitettsü, anungji, Naga nunger mangdang ka asoshi lungjemtsüla, ta paisa tayongzükba ka agütsü.
Tsüngremmung amungba ya longsotepa aser pelatepa benjungtepba dang nungi alia lir, iba ya Ao yim balala lungjemba temaitsü lir, iba ya ajanga nüburtem akangakanga lungjemdaktsür. Iba benjung amungba ajanga alu jenti aruba den yimchiyimjung jenti arutsü asoshi paisa moaja liasü.
Tanep sentong metenzükdang, Mokokchung Town Longsa Senso Telungjem (MTLST)-i anir Mokokchung Police Point nungi Imkongmeren Sports Complex tashi yimdong süa shizüngzü atsür aru. Assam nungi tsüngsanger telok ka densema Chang Hoho (CKS), Lotha Hoho aser Dobashi-temi pei sobaliba ken den yar tsüngsang balala ajanga shilem agia tesentepertem peladaktsü.
Iba sentong nung RD Minister Wb. Metsübo Jamir den Ao Senden Tir Wb. Chubawati Longchar, All Ward Union Mokokchung Tir Wb. R Ayim Lkr, Ungma Puso Menden Chairman Wb. Alemtoshi Imsong, Mokokchung D.C Wb. Rajesh IAS, MTBA Assoc. Pastor P. Toshi parnokia shilem balala agia liasü. Iba den külemi tsükong trok yartsüngsang tetoktepba sentonga ka agia liasü.
Yashi Housing & Mechanical Minister, Tongpang Ozukum-i Tsungremmong Mini Hornbill Festival Mokokchung 2019 tenzükja liasü.
Sentong nung o jembidang Minister Tongpang-i “sorkari telongjem adokdaktsütsü aser medemer yimtepdaktsütsü nükjidong nung iba ama benjung ayongzüka amunger. Talisa iba benjung ayongzükba ya local entrepreneur tem ajungktettsü sabang lapoktsütsü asoshi lir. Iba tangatetba nung Nagaland Startup Policy 2019 tenzük” ta ashi
Sorkari saisapongertem ajungmesotsü atema infrastructures tajung agütsütsü meranger aser ano kaketshirtem meranga züngdaktsütsü atema C.M. meritorious Student Fellowship Awards agütsür, ta Tongpang-isa shisem.
ILP atema Abhishek Singh committee-i ashiba ama sorkari mapa inyaktsü telemtetba agiogo. Ano, October 2, 2019 nungi Nagaland nung plastic mamshitsü lemteta lir, anungji Mokokchung nung alirtemia iba mapa inyaktsü ayongzüker, ta paisa metetdaktsü.
Yashi agiba sentong nung ADC W. Manpai Phom-i Tsüngremmong salem osang aben, MTAT Tir I. Moa Longkumer-i tesentepertem pela agizük aser GBs’ Union Mokokchung Town-i sobaliba ken ka aten.