Sorkari Nagaland Medical College yanglutsü temelaba agütsü

Kohima, July 5 (TYO): Nagaland sorkari Phriebagie Kohima nung Nagaland Medical College yanglutsü atema temelaba agütsüogo.
Bodbarnü Chief Minister Secretariat Office nung Nagaland Medical College Project Governing Committee den sensaksemdang Chief Minister Dr. Shürhozelie Liezietsu-i ki yanglutsü atema temelaba agütsü.
College indang Master Plan indang power point presentation ka sayudang, Chief Minister-i “iba ya Naga nunger shia atema pungmang ka asangsang akümba lir aser taoba mapang state sorkari ali kiburtem den timtem kar ajurua liasü, saka ibaji angatettepogo” ta ashi.
Ali kiburtemi medical college yanglutsü atema parnok li tenlatsü mulungogo, ta paisa shisem.
“Ita ka tashi nung khurettem ajak bentettsü imlar. Nagaland nung ali ya kija aser teloktem indang lir aser khenkhen sorkari terenlok mapa inyaktsü atema ali angutsü nung tetsükdaktsü ajurur. Ajisüaka, Phriebagie, P Khel nung ali kiburtemi state sorkar den angatettepba atema kanga pelar” ta Dr. Shürhozelie-isa metetdaktsü.
Chief Minister-isa Medical Council of India aser Centre sorkari mapa inyaktsü senotsü agütsüba atema pelaba shisem.
Senden nung State Medical Minister, P Longon-i, senotsü aliba jagi asenok tekaratiba nung mapa tenzüktsüla, ta ashi.
Tanü senden nung state sorkari medical college indang master plan agizük. State sorkar aser department nati college yanglutsüba kimung nung arrtsü lung azüngogo aser soil testing mapa temogo.