Sorkari nangzükba ama meinyaker : NFHRCC

Dimapur, November 6 (TYO) : November 5, 2016 nü NFHRCC aser Hoho tem nungi teshimtet nübotem den ENPO President aser ketdangpurtem senden ka mena tenemtsüng lenmang atema tongtipang onük aika jembiogo.
February 2, 2016 nü Nagaland Chief Minister-i kechi südir süaka kilometer 8 earth cutting atema sen crore11.5 agütsütsü nangzük, saka tanü tashi nangzükba ama kecha meinyaker aser appointment-a dena magütsür. Anungji ENPO-i C.M den appointment agitsü aser ibaji tatembangbuba ajurutepba asütsü tanü senden nung bangzünga renem, ta NFHRCC Convener, Supu Jamir-i sangdong ka nung metetdaktsü.
Tanü senden nung adenertemisa, sorkari inyaktsü süra tangsa inyakang mesüra Committee nem bendanga agüjang ta ashitsü telemtetba agi, ta paisa ashi.
Kasa onük nung July 23, 2016 nü CNTC MLA tem den jembidang parnoki kilometer 8 earth cutting atema jibo kecha khuretsa tebilem kechiyong parnoki Chief Minister aser R&B Minister den jembitsütsü ta nangzük. Ajisaka tanü tashi kecha osang mali, anungji CNTC MLA temia yimsüsür mesüka nangzükba ama inyaktsü ayongzüker, ta NFHRCC Convener-isa metetdaktsü.