Sorkari nangzükba sülen NSSATA-i lungkak aitba anener NSF, CNSA & CCoFA nungeri tesayurtem pusema nungiter

Kohima, November 2 (TYO) : State sorkari tezüluba ka nung parnoki akhangba ama mapa inyaktsü ta nangzükba sülen Nagaland State SSA Teachers Association (NSSATA)-i lungkak aitba shilem tanabuba anenogo.
Commissioner & Secretary School Education, F P Solo-i NSSATA President dangi züluba shidi nung, parnoki akhangba onüktem School Education & SCERT minister den benoka olemtepogo aser November 2016 nungsa SSA tesayurtem itasen agütsütsü, ta zülua lir.
SSA tesayurtem indang itasenji non-plan kübok züngsemang ta NSSATA-i takhangba agütsübaji mapang tapet ka nung aser centre-i teyari agütsüba SSA scheme tembangba sülen inyaktsü, ta shidi nungsa shia lir.
SSA atema National Mission Authority-i lateta aliba ozüng aser teinyaktsütem kübok state sorkari anidaker aser installments mapang shitak nung agütsütsü aser itasen memenutsü atema tarutsü nunga iba sülen anidaktsü, ta Commissioner & Secretary School Education-isa shidi nung shia lir.
SSA tesayurtem nem mapang shitak nung itasen agütsütsü atema state sorkari teinyaktsü mapa inyaktsü aser yariteptsü, ta NSSATA-i akhangba ama sorkari telangzüba agütsü.
Tanü Naga Students’ Federation (NSF)-ia lungkak aitertem semdang. Iba mapang NSF president Subenthung Kithan-i ashiba agi, “iba onük adokba sülen nungi onoki NSSATA central leaders aser state sorkar den osang agitepa mapa inyaka aru.”
Naga nunger telok tejentem rongnung NSF ya ka lir aser onoki shisadanga dang mapa inyaker. Anungji, NSF-i pusema nungitba aser yariba memeteti tesayurtemi social media nung NSF anema mejembitsü ayongzüker, ta Subenthung-isa ashi.
“Nenoki akhangba ama State sorkari telangzüba tajung agütsüogo, anungji tesayurtemi mapa nendaka inyaktsü ayongzüker,” ta paisa shisem.
Central Nagaland Students’ Association (CNSA)-ia sangdong ka nung tesayurtemi lungkak aitba atema khuret süa abenba metetdaktsü.
CNSA-i lungkak aitertem pusema nungiter aser state sorkar dang tekaratiba nung tesayurtemi akhangba ama telangzüba agütsütsü mepishia metetdaktsür, ta CNSA President, Charles Lotha aser General Secretary, Yimlanger nati sangdong nung shia lir.
Academic session tatemlen kati aruba mapang tesayurtemi lungkak aitba ajanga sorkar school nung azünger kaketshir meyirjang aika akoksar. Anungji, state sorkari tesayurtem jenjang meraksatsüi aser kaketshirtem timtem majurudaktsüi, telangzüba tajung agütsütsü mepishir, ta CNSA mendenpurtemisa ashi.
Ano, Media Cell Coordination committee on Fuel adulteration (CCoFA)-ia sangdong ka nung, sorkari NSSTA tesayurtem anema tashiyim mapa inyakba aitsüogo.
NSSTA tesayurtemi parnok nem itasen agüjang ta takhangba agüja timi lungkak aitdang, sorkari parnok dak tzü kahloktsübaji tashiyim mapa ka lir, ta NSSTA sangdong nung shia lir.
Tawa state sorkari lungkak aitertem dak tashiyim mapa inyakba ajanga sorkar nung ochimashi lir aser senotsü mashilen amshir aser parnoki itemji jungkai adoktsü tsübur ta tebilemba aliba sayur, ta CCoFA-isa metetdaktsü.
State sorkari tesayurtem dang itasen agütsütsü ta nangzükogo, saka ibaji khen atema dang asütsü aser maneni tesayurtemi parnok itasen angutsü atema lungkak aittsüsa akümtsü ama arentaka bilemer, ta CCoFA-isa metetdaktsü.