Sorkari NDTV India nokdangba sota atar

New Delhi, November 07 (Agencies): Information & Broadcasting ministry-i anogo ka piyong NDTV India channel nokdangtsü tuyuba sota atar.
Hombar nikongdang NDTV mendenbuba, Prannoy Roy-i Information & Broadcasting Minister, Venkaiah Naidu ajuruba sülen ibaji lemtet, ta ministry sangdong ka ajanga metetdaktsü.
Sangdong nung, “Prannoy Roy aser NDTV nungi par teloki tanü nikongdang Information & Broadcasting Minister, Venkaiah Naidu ajuruogo aser parnok tangatetbaji majung ta shia pa dang iba tetuyuba reprangshitsü mepishiba den külemi iba tetuyuba reprangshia tatembang telemtetba ka magi tashi iba tetuyuba sota atatsü mepishi,” ta shia lir.
Hindi news channel nokdangba atema tanep NDTV India-i Supreme Court nung ken o agüja liasü. NDTV-i mepishiba ken o ji Mongolbarnü Supreme Court-i angadangtsü.
Taküm Pathankot amakba osang news channel nung yokdang NDTV channel-i miim osangtem yimjak nung metetdaktsü ta shia Brihostibarnü Information & Broadcasting (I&B) Ministry, Inter-ministerial committee-i November 9 nü iba channel shibangtsü tetuyuba agütsü.
Iba sülen Editors Guild of India-i sorkar aija, sorkari NDTV India anogo ka nokdangba ajanga linük Emergency mapang bilemteter, ta ashi.
Iba den külemi Rahul Gandhi, Nitish Kumar, Mamata Banerjee aser Lalu Prasad nunger densema opposition party lenir aikati sorkar aitsüogo.