Sorkari NE nung sepaitem majemtsü: Rijiju

New Delhi, August 04 (Agencies): Northeast nung aliba Central security sepaitem ajemtsü sentong mali, ta tanü Minister of State for Home, Kiren Rijiju-i metetdaktsü.
Lok Sabha senden nung Rijiju-isa, iba tesem (NE) nung state sorkartemi telungpurtem anema raraba nung Centre sorkari Central Armed Police Forces (CAPF) yokba ajanga yarisemer, ta ashi.
Pai tezüluba nung telangzüba agüja, CAPF sepaitemi lendong aketba tesem aser infrastructure project tem nung security agütsür, ta ashi.
NE nungi Central sepaitem ajema kümtsütsü tebilemba mali, aser security dak sentakba nung state sorkartemi endokba senotsüji meyipa agütsür, ta minister-i ashi.
Ano sorkari agiba meratem rongnung India Reserve Battalion agütsüba, ozüng alema tentetba teloktem nokdangba, Armed Forces (Special Powers) Act kübok ‘disturb area’ sangdongba aser unified command structure atema temetettsü agütsüba densema lir, ta paisa ashi.
Minister-i ashiba agi, National Socialist Council of Nagaland (NSCN) telok asem Centre sorkar den ceasefire tezüngzüktep nung lir.
“March ita nung NSCN-Khaplang teloki ceasefire agien aser rara adokdaktsüogo. Ajisüaka NSCN-IM, NSCN-Khole Kitovi aser NSCN-Reformation den ceasefire nung lir,” ta Rijiju-isa ashi.
Hombar nü yangi (New Delhi) Central sorkari NSCN-IM den peace accord ka yangluogo.
“Assam nung United Liberation Front of Assam (pro-talk), National Democratic Front of Bodoland-Progressive, NDFB (of) Ranjan Daimary aser Karbi Longri NC Hills Liberation Front den ken o maneni jembidagi,” ta Rijiju-isa metetdaktsü.
Paisa, July 11 nü Guwahati nung NE state tem nungi Chief Minister tem den tesem nung security tensa atema o lemtep senden kaogo, ta ashi.