Sorkari Nestle anema NCDRC nung ken o benoktsü

New Delhi, August 11 (Agencies): Department of Consumer Affairs-i Maggi noodles dak sentakba nung Nestle India anema National Consumer Disputes Redressal Commission (NCDRC) nung ken o benoktsü asoshi renemdagi, aser iba ya küm aika tejaklen lateta aliba, Consumer Protection Act kübok aliba temzüng ka tang mezüng amshir asütsü, ta osang ka ajanga ashi.

Osang ajanga ashiba agi, maggi onük nung iba ken o ya, tim masüba nung shishilembaba aser tim masüba nung advertise asüba nung ajemdaker benoktsü, aser sorkari senchi achiba densema tanga temerenshitema agütsütsü asoshi lenmang bushidagi.

India nung aliba state aika nung tendangba mapang maggi nung tesola ketdaktsüba, MSG (Mono Sodium Glutamate) aser temelaba agüja aliba dang nungi ‘lead’ tali inoksema aliba putetba sülen state aika nung maggi nokdanga liasü aser tesülen India unit nung shishilembaba tesem ajak nungi maggi agientsü tuyua liasü.

Linük nung consumer ajak tenüng nung Consumer department-i ken o ka benoktsü, aser ibaji Minister-i agizükogo, ta osang ka ajanga ashi.

Maggi noodles nung food safety standards alema inyakba ya süoki ia agitsü onük ka lir ta shia tamalen Food & Consumer Affairs Minister Ram Vilas Paswan-i, NCDRC-i iba ya bushisüngdangtsü aser tapet temerenshi agütsütsü, ta metetdakja liasü.

Tang mezüng sorkari Consumer Protection Act, Section 12-1 kübok ken o ka benoktsü, koba ajanga Centre aser state tem naprongla nem ken o benoktsü atema tashi agüja lir.

Iba section ajanga NCDRC nung kechi koda ken o benoktsü, iba indang inyakyimji shia lir.

Taküm May ita nungi tenzüka state aika nung Maggi tendangba sülen state aika nung nokdanga liasü, item state rongnung Jammu and Kashmir,     Gujarat, Delhi, Uttarakhand,     Kerala aser Tamil Nadu densema lir, iba dak alia     Army aser Navy canteen nunga maggi nokdangtsü army ketdangsertemi tuyua liasü.