Sorkari Netaji Chandra Bose indang Memorial yanglutsü

New Delhi, April 29 (Agencies): Hokolbarnü sorkari, linük yimtiba nung Netaji Subhash Chandra Bose nüngtem nung memorial ka yanglutsü, ta sangdongogo.
India nüjiso atema rarasang, Netaji dak sentakba file 25 sayaba sentong nung sorkari Netaji nüngtem nung memorial yanglutsü sangdong agütsü.
Tanü sayaba file 25 ji Prime Minister’s Office (PMO) nungi 5, Home Ministry nungi 5 aser Ministry of External Affairs (MEA) nungi file 15 lir, aser itemji 1956 küm nungi 2009 küm tashi indang file tem lir.
Tanü Netaji indang file 25 sayaba sülen Union Culture Minister, Mahesh Sharma-i, “Iba linük nüburtem, talisa lanurtemi Netaji indang taküm otsü aser nüjiso atema pai raraba indang metetner. Anungji iba ya tetongtetba tulu ka lir,” ta ashi.
Pai ashiba agi, lokti tentet balala aser Parliament züngsemtemi akhangba nung ajemdaker sorkari Delhi nung pa nüngtem nung memorial tulu ka yanglutsü lemtet aser iba memorial ajanga pa taküm otsü aser pai linük nüjiso atema raraba sayatsü.
Sharma-isa, Japan linükia Netaji taküm dak sentakba indang file ana sangdongtsü melungogo, ajisüaka parnok ket nung ano file asem aliba indangbo parnoki kecha shia mali, ta metetdaktsü.
“Parnok ket nung Netaji taküm otsü dak sentakba file pongu nungi parnoki file ana sangdongtsü ta onok dang shiogo. Ministry-i maneni parnok den iba onük jembitsü, iba (file 2) ya ajanga osang taliba jangjatsü aser research shisashirtemi ibaji Japan asü  Russia nungi’ar jangjatsü,” ta pai ashi.
Taküm January nung mezüng Netaji dak sentakba file 100 dak tema sayaa liasü, iba sülen March 29 nü Netaji dak sentakba file 50 saya, aser tanü file 25 sayaogo.