Sorkari NGOs 11,000 anentsüogo

New Delhi, November 04 (Agencies): Mulungtet telok 11,000 dak temai June ita tatembang tashi nung registration renew masüba ajanga sorkari item telok anentsüogo, koba ajanga parnoki bendanglen nungi senotsü mangutsü.
Union Home Ministry-i, “Taküm June ita tatem tashi nung Foreign Contribution Regulations Act (FCRA) kübok registration renew masüba telok 11,319 indang registration anentsüogo,” ta metetdaktsü.
“Parnok indang registration validity ji November 1, 2016 nü nungi invalid kümogo,” ta Home Ministry-isa ashi.
Tang sorkari anentsüba mulungtet telok rongnung lajartem anepaluba telok 50 shi, Indian Statistical Institute ama schools aser reju noklang aika aser lenmang nung alir tanurtem atema inyaker nüngtugu mulungtet teloktem densema lir.
2015 küm nunga Home Ministry-i NGOs 10,000 indang FCRA registration anenja liasü, kechiyong parnoki küm asem tashi atonga sen aruba osang magütsü.
Mulungtet telok aika mapa meinyaki tasü liasü mesüra FCRA registration maginüi liasü.
Centre-i iba telemtetba agiba ajanga bendanglen nungi senotsü angutsü melaba NGOs  20,500 dang kümogo.
Foreign Contribution Regulation Act 2010 ajanga permanent registration anentsü, anungji NGO temi küm pongu shia licence renew asütsüla.
2010 küm FCRA ozüng tesashiba akümtsü atema Parliament-i agizüka liasü. Iba mapang nung Congress-i aniba UPA sorkari, bendanglen nungi senotsü teyari nung metaloker aliba NGOs junga mita reprangtsü, ta metetdaktsü.
Tang tashi nung Modi’er sorkari kuli balala nung ajemdaker NGO 22,000 dak tema registration anentsüogo.