Sorkari nija mapa masü saka nübur mapa inyaktsüla: Arunachal Angh

Itanagar, November 04 (Agencies): Arunachal Pradesh nung sorkar lenisüba anema noktakba tensa dak sentakba atema Angh, Jyoti Prasad Rajkhowa-i tebilemtsü kaa jembiogo.
Congress MLA telok kati state Chief Minister, Nabam Tuki anema apusoa tang New Delhi-i oa mongdar.
Yashi osangbenertem senden ka nung state Angh-i, “Lennir melennüa Congress MLA 27 New Delhi nung mongdar ta kü dang shiogo. Ni parnok dang parnok tebilemba toktsür nüburtemi parnok shim ta tangatetba nung state aser nüburtem atema inyakang ta mepishir,” ta ashi.
“Nüburtem atema inyaktsü melena parnoki parnok nija mapa mazüngi inyaker. Sorkari nija mapa masü saka nübur mapa inyaktsüla,” ta pai ashi.
Yimtenren nung mepetmesü aliba ajanga state nung terenlok mapa anendaka lir.
Angh-isa chief minister dang politics meinyaktsüla saka state terenlok atema inyaktsüla, ta shiogo.
“Nüngdak makaba politics asayaba anenang aser terenlok mapa inyakang, kechiyong state nem senotsü peria lemzükja lir. Tang ya mapa inyaktsü mapang,” ta Angh-i ashi.
State yimtiba, Itanagar nung gari lenmang majungba dak sentakba nung Rajkhowa-i, gari lenmang tajung melira state nung terenlok makatettsü, ta ashi.
October 6 nü chief minister Tuki-i pa anema noktaker minister pezü Cabinet nungi anentsüogo. Minister temji- Agriculture Minister Chowna Mein, Co-operative Minister Kumar Waii, Women & Child Development Minister Wanglin Lowangdong aser Water Resources Development Minister Kamlung Mossang nunger lir.
Anogo ishika tejaklen Civil Aviation Minister Thangham Wangham-a council of ministers nungi anentsüogo.
Ano October 26 nü Tourism & Urban Development Minister Pema Khandu-i, Tuki-i sorkar mapa nung tamakok mejungi nguogo ta aija pa sasa minister menden toktsü.