Sorkari onoki latetbatem agizükra GST pusemtsü: Rahul

Mumbai, January 16 (Agencies): Honibar nü Congress tatong Tir Rahul Gandhi-i, party-i lateta alibatem sorkari agizükra Congress-i Goods and Service Taxes (GST) bill pusemtsü aser minute 15 tsüngda nungsa iba bill agizüktettsü, ta ashi.
Congress lenir Rahul-i, “GST Bill onük nung sorkar den hai-aura akattsüji koka lir, ibaji senden mena jembiba ajanga ataloktsü,” ta ashi.
Tanü Mumbai nung Management kaketshirtem den shisa lemsatepba mapang Rahul-i, “Onoki latetbatem agizükba anogo nung GST bill ji agizüktettsü. Iba atemaji minute 15 dang agitsü,” ta ashi.
GST bill nung tetsükdaktsü adokdaktsüba dak sentakba nung Gandhi-i, “GST ozüng ya Congress-i benoka liasü. Iba mapang nungji BJP-i Parliament nung küm tenet tashi GST bill nokdanga liasü. Ibaji agizüktsü Jaitley-i memelung. Narendra Modi-ia Gujarat Chief minister ka ama GST agizüktsü memelung,” ta ashi.
“Sarutem nung tatakzük maliba GST ka onoki maginer. Maximum tax nung telatetba ka aginer,” ta pai ashi.
“GST ji junger ta Jaitley-i kü dang ashitsü menüngdak. Ibaji junger ta ni meteta lir. Ibaji junger ta pai kü dang ashitsü menüngdak,” ta Rahul Gandhi-i ashi.
“Tamalen England nung interview ka agiba mapang Jaitley-i Parliament nokdangtsüji BJP asalendong ta jembia liasü. Parliament nokdangtsüji Congress asalendong masü,” ta paisa ashi.
Aluyimba nung tebilemtsü ajuruba aser tzünglu junga maruba atema sorkari aluyimertem yaritsü atema kechi inyaktsüla ta asüngdangba langzüdang Gandhi-i, “Asenoki aluyimba rongsenkettsüng nungi shisatsü rongsenkettsüng aser industry rongsenkettsüng agi melentsüji mapang agia tanemi inyaktsüla,” ta ashi.
“Aluyimba ya aoksa melenshiba ka kümogo. Linük ka ama asenoki iba sector nungittsüla. Aluyimertem nem minimum support price (MSP) agutsütsü atema onoki ajang-ajanga noktaka liasü. Tejashitsü kaji tan aliba asen sorkar mangdang samaogo. Parnoki aluyimertem aser aluyimba nung kangabo temelung magütsür,” ta paisa shisem.