Sorkari onük 7 mapa küma inyaktsüla : ACAUT Nagaland

Dimapur, August 29 (TYO): Nübortemi ola adokba ama Nagaland sorkar aser India sorkar nati otsüsütsü aketba onük 7 bangzüng mapa küma inyakra, asen lima nung yimjung, terenlok aser azükaru alitsü, ta Media Cell, ACAUT Nagaland-i sangdong ka nung metetdaktsü.
ACAUT aser Naga nungertemi tangatetba shitak nung nokdaker anungji Nagaland sorkari onük 7 ji mapa küma inyaktsü ayongzker. Sorkari Nagaland Lokayukta tentettsüla aser June 8, 2016 nü High Court tetuyuba anema backdoor appointees shima aliba ajak anentsütsüla. Nagaland sorkari item takhangba magizükra aser mapa meinyakra, nübortemi state ajungalen lungkak aittsü aser iba atema sorkar renema atatsüla, ta ACAUT-isa ashi.
Nagaland sorkari nübortemi adokba ola tashi mangara, Naga nunger ajaki ochimashi anema rara asoshi renema atatsü ayongzüker. Iba rara nung asenok mangatetteptem toktsür ka küma longjemer nokdaktsüla, ta Media Cell sangdong nungsa shisem.
Ochimashi Anema Rara tenzükogo aser Nagaland meyipa agitsü atema mapa nübortemi mapa inyaktsü tenzükogo. Tanü putui asüng putu atema mapa inyaktsüla, jila aser districts head quarter tem nung alirtemi meta talang pilar alirtem asoshi nokdaktsü ayongzüker.
Nagaland sorkari nübortemi adokba ola tashi angaa mapa inyaktsü metetdaktsür. Mapang latetja aliba matongdangsa takhangba onüktem asoshi mapa inyaktsüla, kechiyong nübortemi temzüng nung aliba ama temeden meshir, ta ACAUT-isa ashi.
Otsüsütsü rally nung arua adener ajak dang aser talisa 7-Point Public Resolution lemtetba atema ACAUT Nagaland-i kanga pelar, ta Media Cell sangdong nungsa metetdaktsü.