Sorkari opposition dang Parliament süngjema amentsü mepishi

New Delhi, February 9, 2016 : Narendra Modi-i aniba sorkari Parliament nung budget session kanga süngjema kanür ta metetdaktsüba mapang, Union Minister of State for Parliamentary Affairs Mukhtar Abbas Naqvi-i, opposition-i dang süngjema alitsü mulungra sorkari ken o ajak agizüka jembitsü mulunga lir, ta ashi.

February 23 nü Lok Sabha aser Rajya Sabha na külemi amenba senden nung Tir Pranab Mukherjee-i o jembia tan budget session tenzüktsü.

Naqvi-i, “teti budget amenba mapang linük nung nüngdakba bill aika atema olemtepba sülen tagitsü bill tem agizüka ayur,” ta IANS dang interview ka nung ashi.

“Rajya Sabha kija nunga bill 30 tashi anendaka lir aser Lok Sabha nunga yamaji bill aika anendaka lir anungji item bill tem atema olemtep akatsü mapang tongja tongogo,” ta pa ashi.

“Onoki Congress aser tanga party tem dang linük terenlok mapatem menokdangtsü asoshi anguma lua mepishir aser onoki opposition den ken o ajak agizüktepa jembitsü,” ta paisa ashi.

Pai, budget session süngjema agitsüji ajak tebilemtsü asütsüla aser tang benoka aliba bill tem nung opposition-i tebilemba kar shinüa lira sorkari Parliament telung aser tema naprong nung angatsü mulunga lir.

Goods & Services Tax (GST) bill dak sentakba nung pai, iba bill ya memunoi mapa akümtsü kechiba süra opposition tebilembatem asadangogo aser iba nung tetsükdaktsü kecha mali, ta ashi.

Parliamentary Affairs Minister M. Venkaiah Naidu-i congress o tanga party tem den teti tongtepratepa alir aser parnok ajak dak Parliament süngjema amentsü tangatetba tajung lir, ta Naqvi-i ashi.

Budget amentsü anogo melemtet tsüngda senden amentsü atema temulung bendanga agüja jembishinüba ya India parliamentary democracy nung tan mezüng asütsü, ta IANS-i ashi.

Tan budget session-a akhi ama shilem ana lemdanger amentsü, mezüng February 23 nungi March 16 tashi aser tanabubaji April 25 nungi May ita tashi amentsü. Senden ana yongtsü nung anogo 39 anisüngtsü.

“Congress, BJP mesüra party ajaki ozü telok tilaba ta tsübua mebilemtsüla kechiba süra India constitution ajanga ajak nem temeden kasa agüja lir,” ta pai shisem.